நேரத்தைத் திருடலாம்

என்னுடைய Nonfiction பயிற்சி வகுப்பில் நேர மேலாண்மைக்கென்று ஒரு சிறு பாடத்தை ஒதுக்கியிருக்கிறேன். முழு நேரப் பணி, குடும்ப, சமூகக் கடமைகளுக்கு நடுவில் நூல் எழுத வருகிறவர்கள் எழுதுவதற்கான நேரத்தை எங்கிருந்து பெறலாம், அதை எப்படி நன்றாகப் பயன்படுத்திக்கொள்ளலாம் என்று விரிவாகப் பேசுவதற்குதான் அந்த நேரம்.

இந்தப் பாடத்தைக் கற்றுத்தந்தபிறகு, ‘உங்களுடைய இப்போதைய சூழலின் அடிப்படையில் ஓர் எழுத்துத் திட்டத்தை (Writing Plan/Schedule) உருவாக்குங்கள்’ என்று ஒரு சிறு பயிற்சி அளிப்பேன். அதன்பிறகு, ‘இந்தத் திட்டத்தை இன்னும் மேம்படுத்த இயலுமா, குறைந்தது 20% கூடுதல் நேரத்தை எங்கிருந்தாவது எடுக்க இயலுமா?’ என்று கேட்பேன்.

எடுத்துக்காட்டாக, மாதம் ஒரு திரைப்படத்தைக் குறைக்கலாம், கிரிக்கெட் போட்டிகளை, பிக் பாஸை முழுக்கப் பார்க்காமல் ஹைலைட்ஸ்மட்டும் பார்க்கலாம், நாள்தோறும் மூன்று சானல்களில் செய்திகளைப் பார்க்காமல் அதை இரண்டாகக் குறைக்கலாம், தொலைபேசியில் ஒருவரைப்பற்றி ஐந்து பேரிடம் வம்பு பேசுவதை மூன்றாகக் குறைக்கலாம்… இப்படி எங்கிருந்தாவது கொஞ்சங்கொஞ்சமாக எழுத்துக்குக் கூடுதல் நேரத்தைப் பிடுங்கச்சொல்லிக் கேட்பேன், அதன்மூலம் அவர்கள் தங்கள் நூலை ஓரிரு மாதங்கள் முன்பாகவே முடித்துவிடலாம் என்று ஆசை காட்டுவேன்.

அதே நேரம், மூன்று விஷயங்களிலிருந்துமட்டும் எழுத்துக்காக நேரத்தைப் பிடுங்கக்கூடாது, ஏனெனில் அவை Non negotiable, சமரசம் செய்துகொள்ளக்கூடாதவை என்றும் சொல்வேன்:

1. இரவுத் தூக்கம்

2. உடற்பயிற்சி

3. குடும்பத்தினருடன் செலவிடும் நேரம்

இப்படி உங்களுடைய Non Negotiable நேரங்கள், எதற்காகவும் நீங்கள் குறைத்துக்கொள்ள விரும்பாத விஷயங்கள் எவை?

***

என். சொக்கன் நடத்தும் Nonfiction பயிற்சி வகுப்பில் சேர்ந்து புனைவல்லாத நூல்களை எழுதக் கற்றுக்கொள்ளுங்கள். வகுப்பில் சேர, இங்கு க்ளிக் செய்யுங்கள்.

***

Keywords: Time Management, Time Management for Authors, Managing Time, Managing Your Time, Time Management for Writers, Finding Time to Write, Finding Time for Writing

உங்கள் கட்டுரைகளுக்குத் துணைத்தலைப்புகள் தேவையா?

கட்டுரைகள் சிலவற்றில் துணைத்தலைப்புகள் (Subheadings) இடம்பெறுவதைப் பார்க்கிறோம். புனைவல்லாத (Nonfiction) நூல்களின் அத்தியாயங்களுக்குள்ளும் இந்தத் துணைத்தலைப்புகள் இடம்பெறுகின்றன. இவை எதற்காக? இவற்றைக் கண்டிப்பாகச் சேர்க்கவேண்டுமா?

முதலில், துணைத்தலைப்புகள் என்பவை ஒரு கட்டுரையை அல்லது அத்தியாயத்தைச் சிறு பகுதிகளாகப் பிரிக்கின்றன. இதன்மூலம், ஒரு நீண்ட கட்டுரையையோ அத்தியாயத்தையோ படிக்கிறோம் என்ற உணர்வு இல்லாமல் வாசகர் எளிதில் ஒவ்வொரு துணைத்தலைப்பாகப் படித்துக்கொண்டு செல்லலாம்.

எழுதுபவருக்கும் இதில் நன்மை உண்டு. நீண்ட கட்டுரைகள், அத்தியாயங்களை எழுதும்போது சோர்வு இல்லாமல் எழுதுவதற்கு அவற்றைத் துணைத்தலைப்புகளாகத் திட்டமிடலாம், துணைத்தலைப்புகள் ஒவ்வொன்றையும் ஒரு சிறு கட்டுரையாகக் கருதிக்கொண்டு எழுத்தை முன்னெடுத்துச்செல்லலாம். அது அவர்களுக்குத் தனிப்பட்டமுறையில் ஊக்கத்தை அளிக்கும்.

அதே நேரம், துணைத்தலைப்புகள் பொருளுள்ளவகையில் அமையவேண்டும். எடுத்துக்காட்டாக, ஆளுமை ஒருவரைப்பற்றிய கட்டுரையில் பிறப்பு, வளர்ப்பு, கல்வி, முதல் வெற்றி போன்ற துணைத்தலைப்புகள் அமையலாம். அது அந்தக் கட்டுரையை இன்னும் தெளிவாக வழங்கி உதவும். அப்படியில்லாமல் ஒவ்வொரு பத்திக்கும் ஒரு துணைத்தலைப்பை வழங்கினால் அது தேவையற்ற ஒன்றாகத் துருத்திக்கொண்டு தெரியும். அதனால், சரியான சமநிலையைப் பின்பற்றவேண்டும்.

உங்கள் கட்டுரைகள், அத்தியாயங்களில் துணைத்தலைப்புகளைப் பயன்படுத்துகிறீர்களா? அதுபற்றிய உங்கள் கருத்துகளை, எடுத்துகாட்டுகளை, உத்திகளை Comments பகுதியில் பகிர்ந்துகொள்ளுங்கள்.

***

Keywords: Subtitles, Subheadings, Sub titles, Sub headings, Sub title, Sub heading, Subtitle, Subheading, Titles, Title, Nonfiction, Non Fiction, Non-fiction, Nonfiction, Articles, Article, Non Fiction Books, Non-fiction Books, Nonfiction Books, Non Fiction Book, Non-fiction Book, Nonfiction Book

உங்களுடைய எழுத்து வேகம் எவ்வளவு?

நீங்கள் நாள்தோறும் அல்லது ஒரு மணி நேரத்துக்கு எத்தனைச் சொற்கள் அல்லது எத்தனைப் பக்கங்கள் எழுதுகிறீர்கள்?

இது அவ்வளவு முக்கியமா? எண்ணிக்கையைவிடத் தரத்தைத்தானே கவனிக்கவேண்டும்?

உண்மைதான். அதே நேரம், எழுதும் வேகம் என்பதும் பலவிதங்களில் உங்களுடைய வெற்றியைத் தீர்மானிக்கிறது. எடுத்துக்காட்டாக, ஒரு ஐம்பதாயிரம் சொல் நாவலை எழுதுவதற்கு உங்களுக்கு ஆறு மாதம் ஆகிறதா ஒரு வருடம் ஆகிறதா என்பதைப் பொறுத்து நீங்கள் எழுதும் நூல்களின் எண்ணிக்கை மாறுமில்லையா?

அதேபோல், விரைவாக எழுதத் தெரிந்தவர்களுக்கு நிறைய எழுத்து வாய்ப்புகள் கிடைக்கும். அவர்களால் பத்திரிகைகளின் வேகத்துக்கு ஏற்ப எழுத இயலும். ‘சரியான நேரத்துல கதையை அல்லது கட்டுரையைக் கொடுத்துடுவார்’ என்று உங்களுக்கு நல்ல பெயர் வரும்.

இதில் இன்னொரு நன்மை, ஒரு நாளைக்கு இத்தனைச் சொற்கள் எழுதவேண்டும் என்பதுபோல் திட்டமிட்டு வேலை செய்வதற்கு இது உதவும். நூல்கள் போன்றவற்றை எழுதும்போது இந்தத் திட்டமிடல் மிக முக்கியமாகிறது.

விரைவாக எழுதுகிறவர்கள் நிறைய எழுதுவார்கள், அதில் பலவும் தரமாகவும் அமைந்துவிடும். ஆக, எழுத்து வேகம் என்பது ஒருவிதத்தில் தரத்துக்கும் வழிவகுக்கிறது.

ஆக, உங்கள் வேகம் எவ்வளவாக இருந்தாலும் சரி, அதை அறிந்துவைத்திருப்பது நல்லது. அதன்பிறகு, அதை மேம்படுத்தவேண்டுமா என்பதைப்பற்றி யோசிக்கலாம்.

அடுத்தமுறை ஏதாவது எழுதும்போது, பக்கத்தில் ஒரு Stopwatchஐ (அல்லது உங்கள் மொபைல் ஃபோனில் உள்ள Stopwatch Applicationஐ) வைத்துக்கொண்டு உங்கள் எழுத்து வேகத்தை அளந்து பாருங்கள். அது உங்களுக்குப் போதுமா, இன்னும் விரைவாக்கவேண்டுமா என்று சிந்தியுங்கள்.

எழுதும் வேகம், தட்டச்சு செய்யும் வேகத்தை விரைவாக்கப் பல வழிகள் உள்ளன. இணையத்தில் அவற்றைப் படித்துப் பயிற்சி எடுத்துக்கொள்ளுங்கள், விரைவாகவும் சிறப்பாகவும் எழுதப் பழகுங்கள். எப்படி ஒரு கிரிக்கெட் வீரருக்கு ஓடும் வேகம், தாவும் வேகம் முக்கியமோ, அதுபோல்தான் எழுத்தாளராகிய உங்களுக்கு எழுதும் வேகம், அதற்குப் பயிற்சி அவசியம்.

***

Keywords: Writing Speed, Speed of Writing, Pace, Fast, Slow, Number of words, Number of words per hour, Number of words per day

இணையத்தில் தொடர் எழுத ஏழு நல்ல வழிகள்

தொடர்கதைகள், நாவல்களுக்கு இடையிலான வேறுபாட்டைப்பற்றிச் சமீபத்தில் பேசினோம். (அந்தக் கட்டுரையைப் படிக்க, இங்கு க்ளிக் செய்யுங்கள்). இப்போது, எழுத்தாளராகிய நீங்கள் இணையத்தில் தொடர்களை எழுதுவதற்கு என்னென்ன வாய்ப்புகள் உள்ளன என்று பார்ப்போம்.

இணையம் என்பது ஒரு பெரிய கடலைப்போன்றது. அங்கு தொடர்களை எழுதுவதற்கும் பல வழிகள் இருக்கின்றன. எனினும், அவற்றில் முக்கியமான, எல்லாரும் பயன்படுத்தக்கூடிய ஏழு வழிகளை இங்கு தொகுத்து அளிக்கிறோம்.

1

உங்கள் வலைப்பதிவு (blog) அல்லது சொந்த வலைத்தளத்தில் தொடர் எழுதலாம். ஒவ்வோர் அத்தியாயத்தையும் தனித்தனியாக நாள்தோறும் அல்லது வாரந்தோறும் வெளியிடலாம், வாசகர்கள் முந்தைய அத்தியாயங்களை எளிதில் படிப்பதற்கு வழி அமைத்துத் தரலாம். இதில் இன்னொரு வசதி, வாசகர்கள் கமெண்ட் (கருத்து) அளிக்கவும் வழி உண்டு.

2

உங்கள் ஃபேஸ்புக் பக்கத்தில் தொடர் எழுதலாம். இங்கும் கமெண்ட்ஸ் வசதி உண்டு. ஆனால், முந்தைய அத்தியாயங்களுக்கு இணைப்பு தருவது சற்றுச் சிரமம். அதற்கு நீங்கள் ஹேஷ்டேக் எனப்படும் முறையைப் பயன்படுத்தலாம். எடுத்துக்காட்டாக, உங்கள் தொடரின் பெயர் “அன்பே வா” என்று இருந்தால், #AnbeVaa #AnbeVaaSerial #அன்பேவா #அன்பேவாதொடர் என்பதுபோன்ற ஹேஷ்டேக்ஸை உங்கள் அத்தியாயங்களின் கீழ்ப்பகுதியில் அளிக்கலாம். வாசகர்கள் அதைக் க்ளிக் செய்து மற்ற அத்தியாயங்களைப் படிப்பார்கள்.

3

மின்னஞ்சலில் தொடர் எழுதலாம். இது உங்கள் வாசகர்களை நேரடியாகச் சென்று சேரும். ஆனால், இதற்குக் கொஞ்சம் கூடுதல் உழைப்பு தேவை. அதாவது, வாசகர்களுடைய மின்னஞ்சல் முகவரிகளைத் திரட்டுவது, வாசகர்கள் தாங்களே பதிவு செய்ய வழி உண்டாக்கித் தருவது, அவர்களுக்கு மின்னஞ்சல்கள் சரியாகச் சென்றுசேர்வதை உறுதிசெய்வது போன்றவை. இதற்கான வழிகளை (எடுத்துக்காட்டு: மின்னஞ்சல் குழுக்கள், Newsletters எனப்படும் மின்னஞ்சல் கடிதங்கள்) இணையத்தில் தேடிக் கற்றுக்கொள்ளுங்கள், ஒருமுறை கற்றுக்கொண்டால் பலமுறை பலன் உண்டு.

4

மின்னஞ்சலுக்குப் பதில் வாட்ஸாப், டெலக்ராம் போன்றவற்றையும் நீங்கள் தொடர் எழுதப் பயன்படுத்தலாம். அதாவது, உங்கள் தொடருக்கென்று தனிக் குழு தொடங்கலாம், அல்லது, Broadcast எனப்படும் பரப்பல் தொழில்நுட்பத்தைப் பயன்படுத்தலாம். இங்கும் உங்களுக்கு உடனுக்குடன் கருத்துகள் கிடைத்துவிடும், கதையைக் கொஞ்சம் கொஞ்சமாக மெருகேற்றிச் சிறப்பாக்கலாம்.

5

இணையத்தில் Story Forums எனப்படும் கதை மன்றங்கள் பலவும் உள்ளன. இவற்றில் உங்கள் கதையை ஒவ்வோர் அத்தியாயமாக வெளியிடலாம். இந்த மன்றங்களுக்கு ஏற்கெனவே பல்லாயிரம் வாசகர்கள் இருப்பார்கள் என்பதால், உங்கள் தொடர் எளிதில் அவர்களுக்குச் சென்று சேரும். இந்த மன்றங்கள் கருத்து தெரிவித்தல், பிறரிடம் பகிர்ந்துகொள்ளுதல் போன்றவற்றுக்கும் வசதி உண்டாக்கித் தருவார்கள் என்பதால், நீங்கள் தொழில்நுட்பத்தைப்பற்றிக் கவலைப்படாமல் எழுத்தில் கவனம் செலுத்தலாம்.

6

உங்கள் தொடர் எழுத்து வடிவத்தில்தான் வெளியாகவேண்டும் என்று எந்தக் கட்டாயமும் இல்லை. இணையத்தின் தொழில்நுட்ப வசதியைப் பயன்படுத்திக்கொண்டு வீடியோ, ஆடியோ (ஒலிப் பதிவு) போன்ற வழிகளிலும் உங்கள் தொடரை வெளியிடலாம். இதற்குக் கொஞ்சம் கூடுதல் உழைப்பு (எடுத்துக்காட்டாக, தொடர் அத்தியாயங்களைப் படித்து ஒலிப் பதிவு செய்தல், வீடியோ உருவாக்குதல் போன்றவை) தேவைப்படும். ஆனால், எழுத்து வடிவத் தொடர்களை நெருங்காத பல புதிய வாசகர்கள் உங்களுக்குக் கிடைப்பார்கள்.

இந்த வடிவத்தில் மக்கள் கதைகளைப் படிப்பார்களா என்று ஐயமாக உள்ளதா? இங்கு க்ளிக் செய்து Audible இணையத் தளத்தில் உள்ள கதைகளின் பட்டியலைப் பாருங்கள், நம்பிக்கை வந்துவிடும். ஒலிப் புத்தகங்கள் வெற்றியடையும்போது ஒலித் தொடர்களுக்கும் நல்ல வரவேற்பு இருக்கும்.

7

ஒவ்வோர் அத்தியாயத்தையும் ஒரு குறிப்பிட்ட நேரத்தில் Facebook Live போன்ற ஒரு தொழில்நுட்பத்தைப் பயன்படுத்தி நேரடியாக ஒளிபரப்பலாம். அதை உங்களுடைய சமூக வலைப்பக்கங்களில் அறிவித்து மக்களுடைய ஆதரவைத் திரட்டலாம். இந்த முறையின் மிகப் பெரிய நன்மை, உங்கள் தொடருக்கான கருத்துகள் உடனுக்குடன் கிடைக்கும்.

இதுபோல் உங்கள் மனத்தில் உள்ள தொடர் யோசனைகளை Comments பகுதியில் எழுதுங்கள். அவை எல்லா எழுத்தாளர்களுக்கும் பயன்படும். சேர்ந்து கற்றுக்கொள்வோம், உங்கள் தொடருக்கு வாழ்த்துகள்.

***

Keywords: Novels, Novel, Serials, Serial, Series, Story Series, Cliffhanger, Facebook, YouTube, Podcasts, Video Serials, Audio Serials, Audio Episodes, Video Episodes, Podcast, Audio Episode, Video Episode, Video Serial, Audio Serial, Facebook, Facebook Live, Email Groups, WhatsApp Groups, Telegram Groups, Forums, Chapters, Chapter, Episodes, Episode

நாவலுக்கும் தொடர்கதைக்கும் என்ன வேறுபாடு?

எழுத்தாளர்கள் எழுதும் பெரிய கதைகளை நூலாக வெளியிடும்போது “நாவல்” அல்லது “புதினம்” என்று அழைக்கிறோம். அந்தக் கதைகளில் சில, பத்திரிகைகளில் தொடர்களாகவும் வெளிவருகின்றன. அப்போது அவற்றைத் “தொடர்கதை” என்று அழைக்கிறோம். இந்த இரண்டும் ஒன்றுதானா?

தொடர் என்பது பத்திரிகைகளின் வசதிக்காக அமைந்த ஒன்று. அதாவது, ஒரே கதையை மொத்தமாகத் தந்து சலிப்பை உண்டாக்குவதைவிட, அதை வாரம் கொஞ்சமாகப் பிரித்துத் தருவார்கள், அத்துடன், ஆர்வத்தைத் தூண்டி வாசகரைத் திரும்பத் திரும்பத் தங்கள் பத்திரிகையை வாங்க வைப்பார்கள்.

இவ்வகைத் தொடர்கள் கதைகளுக்குதான் என்று இல்லை, தொடர் கட்டுரைகள் உண்டு, தொடர் கவிதைகள் உண்டு, இன்னும் பலவகைத் தொடர்கள் இருக்கின்றன.

ஆக, ஒரு நாவல் தொடராக எழுதப்படுகிறது, இன்னொரு நாவல் மொத்தமாக ஒரே நேரத்தில் எழுதப்படுகிறது என்கிற காரணத்தால் அவை இரண்டும் வெவ்வேறாகிவிடாது. அவற்றுக்கான அடிப்படை எழுத்து உத்திகள் ஒன்றுதான்.

எனினும், தொடராக வெளியாகும் நாவல்களுக்குச் சில கூடுதல் அம்சங்கள் உண்டு. எடுத்துக்காட்டாக, தொடர்கதைகளின் ஒவ்வோர் அத்தியாயத்தின் நிறைவிலும் வாசகரைத் தக்கவைத்துக்கொள்வதற்காக ஓர் அதிர்ச்சியான, வியப்பான, எதிர்பாராத ஒரு விஷயத்தை வைப்பது வழக்கம். ஆங்கிலத்தில் இதை Cliffhanger என்பார்கள். இது நாவல்களுக்குப் பெரும்பாலும் தேவைப்படாது, இருந்தாலும் பிழை இல்லை.

அதேபோல், தொடர்கதைகளில் ஒவ்வோர் அத்தியாயமும் கிட்டத்தட்ட ஒரே அளவில் இருக்கவேண்டும். நாவல்களில் அவை எப்படி வேண்டுமானாலும் அமையலாம்.

நீங்கள் ஒரு நாவல் எழுதினாலும் சரி, தொடர்கதை எழுதினாலும் சரி, அதற்கான ஆராய்ச்சி, தயாராதல் என அனைத்தும் கிட்டத்தட்ட ஒரேமாதிரிதான் அமையும். தொடராக எழுதும்போது அந்தப் பத்திரிகையின் தேவைகளை அறிந்து அதற்கேற்பச் சில கூடுதல் விஷயங்களைச் செய்வீர்கள், அவ்வளவுதான். பின்னர் அதைத் தொகுத்து நாவலாக வெளியிடும்போது, தேவைப்பட்டால் அந்த சில அம்சங்களை நீக்கிவிட்டுக்கூட வெளியிடலாம், அப்படியே வெளியிட்டாலும் பிரச்சனை இருக்காது.

உங்களுக்குப் பிடித்த நாவல்கள், தொடர்கதைகளைப்பற்றி Comments பகுதியில் சொல்லுங்கள்!

***

Keywords: Novels, Novel, Serials, Serial, Series, Story Series, Cliffhanger, Chapters, Chapter, Episodes, Episode

வாசகர் பார்வையிலிருந்து எழுதுங்கள்: சொல்கிறார் வாரன் பஃபெட்

உலகின் மிகச் சிறந்த முதலீட்டாளர்களில் ஒருவர், நிதி, தொழில் சார்ந்த சிந்தனையாளர் வாரன் பஃபெட். அவரைப் பார்த்து முதலீட்டுத் துறைக்குள் வந்தவர்கள், வந்துகொண்டிருப்பவர்கள் ஏராளம்.

அது சரி, ‘எழுதுவோம்’ தளத்தில் அவர் ஏன் வருகிறார் என்று கேட்கிறீர்களா? காரணம் இருக்கிறது.

கடந்த பல ஆண்டுகளாகத் தன்னுடைய பங்குதாரர்களுக்குச் சிறப்பான கடிதங்களை எழுதிவருகிறார் வாரன் பஃபெட். அவற்றை எல்லாவிதமான மக்களும் படித்துப் பயன் பெறுகிறார்கள். அப்படியானால், எழுத்தாளர்களாகிய நாமும் அவரிடம் கற்றுக்கொள்ள ஓரிரு விஷயங்கள் இருக்குமில்லையா?

‘நான் எழுதும்போது வாசகருடைய பார்வையில் என்னை வைத்துக்கொள்வேன்’ என்கிறார் வாரன் பஃபெட். அதாவது, அவர் வாசகராக இருந்தால் அந்தக் கடிதத்தில் அல்லது கட்டுரையில் என்னவெல்லாம் எதிர்பார்ப்பார் என்பதை முதலில் சிந்திக்கிறார், பிறகு, அவை அனைத்தையும் அழகாகத் தொகுத்து எழுதிவிடுகிறார், மக்களும் அதைக் கொண்டாடிப் படிக்கிறார்கள்.

எளிய வழிமுறைதான், ஆனால், பின்பற்றக் கடினமானது, பின்பற்றினால் மிகப் பெரிய வெற்றியைத் தரக்கூடியது: வாசகருடைய பார்வையில் இருந்து எழுதுதல், வாசகரைப் புரிந்துகொள்ளுதல், அவர் எதிர்பார்க்கிறவற்றை நம் படைப்பில் வழங்குதல். இவை அனைத்தையும் வாரன் பஃபெட்டிடம் கற்றுக்கொள்வோம்.

வாரன் பஃபெட் எழுதிய புகழ் பெற்ற பங்குதாரர் கடிதங்களின் தொகுப்பு நூலைப் படிக்க, இங்கு க்ளிக் செய்யுங்கள்

***

Keywords: Warren Buffett, Berkshire Hathaway, Investor, Writer, Writers, Authors, Author, Writing, Investment, Advice, Reader, Reader Perspective

உங்கள் கதையில் எத்தனைப் பாத்திரங்கள் இருக்கலாம்?

சிறுகதைகள், குறுநாவல்கள், நாவல்கள் எழுதும்போது அவற்றில் உள்ள கதாபாத்திரங்கள் (கதை மாந்தர்கள்) எண்ணிக்கையைப்பற்றிப் பலருக்கு ஐயம் எழும். ‘ஒருவேளை நான் நிறையப் பேரைக் கதையில சேர்த்துக் குழப்பறேனோ’ என்று யோசிப்பார்கள். அல்லது, ‘இதுல வர்ற ஆளுங்க போதாதோ’ என்று கவலைப்படுவார்கள்.

உண்மையில், ஒரு கதைக்கு ஏற்ற பாத்திரங்களின் எண்ணிக்கையை எப்படித் தீர்மானிப்பது?

இங்கு எண்ணிக்கையைவிடத் தரம்தான் முக்கியம். அதாவது, ஏராளமான கதை மாந்தர்களைச் சேர்த்து அவர்கள் ஒவ்வொருவரையும் வாசகர் மனத்தில் தங்கச் செய்வதும் சாத்தியம், குறைந்த கதை மாந்தர்களை வைத்துக்கொண்டு வாசகர்கள் அவர்களைச் சிறிதும் கண்டுகொள்ளாதபடி ஆக்குவதும் சாத்தியம். தரம் இருந்தால் எல்லாம் சரியாக அமையும்.

அதனால், உங்கள் கதையை இன்னொரு முறை இந்தக் கோணத்தில் பாருங்கள். அதிலுள்ள ஒவ்வொரு பாத்திரத்தைப்பற்றியும் சில கேள்விகளைக் கேளுங்கள்:

  • இந்தப் பாத்திரம் இந்தக் கதைக்கு முக்கியமா?
  • இதை நீக்கிவிட்டால் என்ன ஆகும்? (எதுவும் ஆகாது என்றால், அது தேவையில்லாத பாத்திரம் என்று பொருள்)
  • இந்தப் பாத்திரத்துக்கு இப்போது நான் தந்திருக்கும் முக்கியத்துவம் போதுமா? அதைக் கூட்டவேண்டுமா அல்லது குறைக்கவேண்டுமா?
  • ஒவ்வொரு பாத்திரத்துக்கும் தேவையான அளவு பின்னணி, அழுத்தம் இருக்கிறதா? அந்தப் பாத்திரத்தின் தன்மையை நான் நன்கு புரிந்துகொண்டிருக்கிறேனா? அதைச் சரியாக எழுத்தில் கொண்டுவருகிறேனா? இந்தப் பாத்திரம் வெளிப்படும் தன்மையில் ஏதும் முரண்கள் இருக்கின்றனவா?
  • இந்தப் பாத்திரம் வாசகர் மனத்தில் உருவாக்கவேண்டும் என்று நான் நினைக்கிற உணர்வு என்ன? அதைக் கதை சரியாகச் செய்கிறதா?
  • நான் ஒரே காட்சியில் பல பாத்திரங்களைச் சேர்த்துக் குழப்பம் உண்டாக்குகிறேனா? ஆம் எனில், அவற்றைப் பல காட்சிகளாகப் பிரிப்பது சாத்தியமா? இயலாது என்றால், பாத்திரங்களுக்குள் குழப்பம் வராதபடி எழுதுவது எப்படி?

இப்படிப் பாத்திரங்களைச் சிந்திப்பதற்காகவே உங்கள் கதையை இன்னொருமுறை புரட்டுங்கள். எழுதுமுன்பே இவற்றைச் சிந்தித்துவிட்டு எழுதத் தொடங்கினால் இன்னும் சிறப்பு.

உங்கள் கதையைப் படிக்கும் வாசகர்களிடமும் உங்கள் பாத்திரங்களைப்பற்றிப் பேசுங்கள். அவர்களுக்குப் பிடித்த, பிடிக்காத பாத்திரங்கள் எவை, ஏன் என்று விசாரியுங்கள். இதுவும் உங்களுடைய பாத்திரத் தேர்ந்தெடுத்தலுக்கு உதவும்.

நல்ல பாத்திரங்கள் உங்கள் கதைகளைப் பெரிய உயரங்களுக்குக் கொண்டுசெல்லும். வாசகர்கள் அந்தப் பாத்திரங்களை (உங்களையும்தான்) நன்கு கொண்டாடுவார்கள். அப்படிப்பட்ட பாத்திரங்களை நீங்கள் உருவாக்கி வெற்றிபெற வாழ்த்துகள்.

***

Keywords: Novels, Novel, Short Stories, Short Story, Shortstories, Shortstory, Novelettes, Novelette, Stories, Story, Fiction, Fictional Stories, Fictional Characters, Characters, Character, Fictional Story Characters, Number of Characters, Character Sketch, Balance

சிறுகதைகள், நாவல்களில் உண்மை நிகழ்வுகள் வரலாமா?

எழுத்தைப் புனைவு (Fiction), புனைவற்றவை/அபுனைவு (Nonfiction) என்று பகுக்கிறோம். இதன் பொருள், கதை, நாவல், குறுநாவல், கவிதை, நாடகம் போன்றவை புனைந்து உருவாக்கப்படுகிறவை, அவற்றில் கற்பனை இருக்கலாம், சில நேரங்களில் அவை முழுக் கற்பனையாகக்கூட இருக்கலாம் (எடுத்துக்காட்டு: அறிவியல் புனைகதைகள்). ஆனால், புனைவற்ற/அபுனைவு நூல்களில் எந்தக் கற்பனையும் இருக்கக்கூடாது.

ஆனால், சிறுகதைகள், நாவல்கள், குறுநாவல்களில் உண்மை நிகழ்வுகள் வரலாமா?

உண்மையில், பெரும்பாலான புனைவுகள் நடந்த ஒரு நிகழ்வு அல்லது மனிதரைப் பின்னணியாகக் கொண்டுதான் எழுதப்படுகின்றன. நேரடியாகப் பார்த்தவை, செய்தித்தாள்களில், நூல்களில் படித்தவை, பிறர் சொல்லக் கேட்டவை, ஆராய்ச்சியின்மூலம் அறிந்தவை, கல்வெட்டுகள், செப்பேடுகளில் கண்டவை என்று பலவிதமான உண்மைகள் புனைவுகளுக்கு அடிப்படையாக இருக்கின்றன. அதில் எந்தப் பிழையும் இல்லை.

அதே நேரம், அந்த உண்மைகளோடு புனைவுகளைக் கலந்து எழுதும்போது, இது புனைவுதான், உண்மை இல்லை என்பதைத் தெளிவாகச் சொல்லிவிடவேண்டும். இல்லாவிட்டால் நேர்மையான மனிதர் ஒருவர் திருட்டுத்தனமான வேலையொன்றைச் செய்தார் என்பதுபோன்ற கற்பனையை நீங்கள் எழுதப்போக, நாளைக்கு அதை மக்கள் உண்மையாக நம்பிவிடக்கூடும், அதனால் அந்த மனிதருடைய பெயருக்கு இழுக்கு ஏற்படக்கூடும்.

அதனால், புனைவு நூல்களுக்கு ஆராய்ச்சி செய்யும்போது உண்மை நிகழ்வுகளைச் சரியானபடி முன்வைக்கவேண்டும், தகவல்களைப் பயன்படுத்திக்கொள்ளலாம், ஆனால், எது கற்பனை என்பதைத் தெளிவுபடுத்தவேண்டும். தேவைப்பட்டால், ‘இந்த நூலில் சில உண்மை நிகழ்வுகள், மனிதர்கள் இடம்பெற்றிருந்தாலும், இது அந்த நிகழ்வுகளின், மனிதர்களின் கதை இல்லை. இதைக் கற்பனைப் படைப்பாகவே கருதுங்கள்’ என்பதுபோல் ஒரு பொறுப்பு துறப்பை (Disclaimer) நூலில் சேர்க்கலாம். அல்லது, அந்த உண்மை நிகழ்வு, மனிதரின் சாயல் தெரியாதபடி கற்பனையைப் பயன்படுத்தலாம்.

உங்களுக்குப் பிடித்த புனைவு நூல்கள் எவை? அவற்றில் உண்மைகள் கலந்திருக்கின்றனவா? ஆம் எனில், எந்த விகிதத்துக்குக் கலந்திருக்கின்றன? எப்படிக் கலந்திருக்கின்றன? அது நூலுக்கு எப்படி உதவுகிறது?… இதையெல்லாம் ஆராய்ந்து பாருங்கள், கற்றுக்கொள்ளுங்கள், அது உங்கள் எழுத்தை இன்னும் சிறப்பாக்கும்.

***

Keywords: Fiction, Short Stories, Shortstories, Short Story, Shorstory, Novel, Novels, Novelette, Novelettes, Research, Researching, Nonfiction, Truth, True, True Story, True Stories, True Novel, True Novels, Novels based on truce incidents, Stories based on true incidents, True incidents, true incident, Fact, Facts, Fact Vs Fiction, Facts Vs Fiction, Facts in Fiction

உங்கள் புத்தகத்தை நன்கு மார்க்கெட்டிங் செய்து விற்பனை செய்வது எப்படி: கற்றுத்தருகிறார் எழுத்தாளர் நிக் ஸ்டீஃபன்சன்

புத்தக எழுத்தைப்போல் மார்க்கெட்டிங் என்பதும் ஒரு முக்கியமான நுட்பம். இதன்மூலம் உங்கள் நூல் இன்னும் பலருக்கு எளிதில் சென்று சேர்வதற்கான வாய்ப்பு அமையும். இதைச் சரியாகச் செய்தால், எழுத்தாளர்களுக்கான மாத வருமான வழி ஒன்று தானாக உருவாகிவிடும்.

ஆனால், பெரும்பாலான எழுத்தாளர்களுக்கு இந்த மார்க்கெட்டிங் நுட்பங்கள் தெரிந்திருப்பதில்லை. இது கடினம்தான், ஆனால், கற்றுக்கொண்டுவிட்டால் எளிதாகிவிடும்.

அவ்வகையில், புகழ் பெற்ற எழுத்தாளர் நிக் ஸ்டீஃபன்சன் வரும் அக்டோபர் 7 அன்று “$0 to $1K a Month in Book Sales” என்ற தலைப்பில் இலவசப் பயிற்சி வகுப்பு ஒன்றை நடத்துகிறார். ஆர்வமுள்ளவர்கள் அதில் கலந்துகொண்டு கற்றுக்கொள்ளுங்கள், சந்தைப்படுத்தலை வலுவாக்கி உங்கள் விற்பனையைப் பெருக்குங்கள்.

நிக் ஸ்டீஃபன்சன் அவர்கள் நடத்தும் இலவசப் பயிற்சி வகுப்பில் கலந்துகொள்ள, இங்கு க்ளிக் செய்யுங்கள்.

நிக் ஸ்டீஃபன்சன் அவர்களுடைய புத்தகங்களைக் காண, இங்கு க்ளிக் செய்யுங்கள்.

***

Keywords: Writing, Writers, Writer, Authors, Author, Publishing, Editing, Courses, Course, Writing Courses, Writing Course, Free Writing Courses, Editing Courses, Publishing Courses, Learn to Write, Writing Workshops, Writing Workshop, Marketing, Promotion, Publicity, Promoting Books, Selling Books, Sales

பயிற்சிகளின்மூலம் எழுதக் கற்றுக்கொள்ள இயலுமா? எழுத்தாளர் பா. ராகவன் பேட்டி

இதே தலைப்பில் இன்னும் சில முக்கியமான பதிவுகள்:

***

Keywords: Writing, Writers, Writer, Authors, Author, Art of writing, Writing classes, Writing Class, Writing Workshops, Writing Workshop, Courses, Course, Writing Courses, Writing Course, Pa. Raghavan, Pa. Ragavan, Learn to write, Learn Writing