சிறந்த குறுநாவல்களுக்குப் பரிசு வழங்கும் குவிகம் குறும் புதினம் போட்டி 2022-23

“குவிகம்” இணைய இதழ் குறும் புதினங்கள், அதாவது, குறுநாவல்களுக்கான ஒரு போட்டியை அறிவித்துள்ளது. சிறந்த குறுநாவல்களுக்கு வழங்கப்படும் பரிசுகளின் விவரம்:

முதல் பரிசு: ரூ 5000
இரண்டாம் பரிசு: ரூ 3000
மூன்றாம் பரிசு: ரூ 2000
பிரசுரத்துக்குத் தேர்வாகும் மற்ற குறுநாவல்களுக்கு: ரூ 1000

உங்கள் குறுநாவல்கள் 4000இலிருந்து 8000 சொற்களுக்குள் இருக்கவேண்டும். இதற்குமுன் எங்கும் வெளியாகியிருக்கக்கூடாது. யுனிகோட் எழுத்துருவில் இருக்கவேண்டும்.

குறுநாவல்களை அனுப்பவேண்டிய மின்னஞ்சல் முகவரி: kurumpudhinam@gmail.com
குறுநாவல்களை அனுப்பவேண்டிய கடைசி நாள்: 15 டிசம்பர் 2021

அனைவரும் இந்தப் போட்டியில் கலந்துகொள்ளுங்கள், வெற்றிபெறுங்கள், வாழ்த்துகள்!

***

Keywords: Competition, Competitions, Contest, Contests, Prize, Prizes, Novels, Novel, நாவல், Novelettes, Novelette, Novella, Novellas, குறுநாவல், குறு நாவல், குறும் புதினம், குறும்புதினம்

மொழி சார்ந்த பணிகளுக்கு முக்கியத்துவம் தரும் “அருஞ்சொல்” தளம்

புகழ் பெற்ற எழுத்தாளர் சமஸ் தொடங்கியிருக்கும் “அருஞ்சொல்” தளம் செய்திகளின் அடிப்படையில் கருத்துகளை விவாதிக்கும் தளமாகத் தொடங்கப்பட்டிருக்கிறது. அதுபற்றிச் சமஸ் அவர்கள் வெளியிட்டுள்ள அறிவிப்பில் ஒரு விஷயம் நம் கவனத்தை ஈர்க்கிறது:

பல்வேறு தரப்பினருக்கும் மொழி சார்ந்து அயல்பணி முறையில் பிரதியை செப்பனிட்டுத் தரும் ‘அருஞ்சொல் எடிட்’

தமிழில் எடிட்டிங் எனப்படும் மொழிச் செப்பனிடுதலுக்குத் தேவையான முக்கியத்துவம் தரப்படுவதில்லை என்பதுதான் உண்மை. அதனால் தமிழில் பிழை மலிந்த எழுத்துகளும் நிறைந்திருக்கின்றன. இந்நிலையில் சமஸ் போன்ற எழுத்தாளர்கள் இதற்கு முக்கியத்துவம் தந்து தனிச் சேவை ஒன்றைத் தொடங்குவது இந்த முக்கியப் பணிக்குப் பெரும் ஆதரவாக இருக்கும், பிழை இல்லாத நல்ல எழுத்துக்கு வரவேற்பைக் கொண்டுவரும்.

ஒவ்வொருவரும் தங்கள் எழுத்தைப் பிழையின்றி எழுத முயல்வதுதான் சரி. அதற்கு வாய்ப்பு அல்லது அதற்கேற்ற திறமை இல்லாதபோது, உரிய திறமையாளர்களுடைய சேவையைப் பயன்படுத்திக்கொண்டு திருத்தி வெளியிடவேண்டும். நம் எழுத்து பிழையின்றி இருப்பதுதான் நமக்குப் பெருமை என்ற உணர்வு வரவேண்டும்.

***

நம் “எழுதுவோம்” தளமும் தேவையுள்ள எழுத்தாளர்களுக்குத் தொழில்முறை எடிட்டிங் சேவையை வழங்குகிறது. உங்கள் நூல்களை பிழையின்றி எடிட்டிங் செய்து தர, எங்களைத் தொடர்புகொள்ளுங்கள்: ezhudhuvom@gmail.com

***

தொடர்புடைய நூல்கள்:

***

Keywords: Tamil, Thamizh, Tamizh, Thamil, Ilakkanam, இலக்கணம், பிழை, பிழையின்றி, பிழையின்றி எழுதுதல், பிழை திருத்தல், பிழைத் திருத்தல், பிழை திருத்தம், பிழைத் திருத்தம், பிழைத்திருத்தம், பிழைதிருத்தம், பிழைதிருத்தல், பிழைத்திருத்தல், நல்ல தமிழ், நல்ல தமிழ் எழுதுவோம், எடிட்டிங், எடிட், எடிட்டர், Editing, Editor, Professional Editing, Freelance Editing, Freelance Editor, Freelance Editors, Editors

உங்கள் கதை, கவிதை, கட்டுரைகளை ஒரே நேரத்தில் பல பத்திரிகைகளுக்கு அனுப்பலாமா?

நீங்கள் எழுதியுள்ள கதை, கவிதை, கட்டுரை போன்றவற்றைப் பத்திரிகைகளுக்கு அனுப்பும்போது கவனத்தில் வைக்கவேண்டிய ஒரு விஷயம், ஒரே படைப்பை ஒரே நேரத்தில் பல பத்திரிகைகளுக்கு அனுப்பக்கூடாது. அதாவது, ஒரு பத்திரிகை உங்கள் படைப்பைப் பரிசீலித்துக்கொண்டிருக்கும்போது அதை இன்னொரு பத்திரிகைக்கு அனுப்பக்கூடாது.

ஏன் அப்படி?

உங்கள் படைப்பைப் பரிசீலிப்பது என்பது அந்தப் பத்திரிகைக்கு ஒரு நேர முதலீடு. அதைச் செய்து அவர்கள் உங்களுடைய படைப்பைத் தேர்ந்தெடுத்தபிறகு, அது ஏற்கெனவே இன்னொரு பத்திரிகையில் வெளியாகிவிட்டது என்று தெரிந்தால், அவர்களுடைய நேர முதலீடு வீணாகிவிடுகிறது.

நீங்கள் இப்படி ஒரே நேரத்தில் உங்கள் கதை, கவிதை, கட்டுரையைப் பலருக்கு அனுப்பினால், சில நேரங்களில் இரண்டு பத்திரிகைகள் ஒரே நேரத்தில் உங்கள் கதை, கவிதை, கட்டுரையைத் தேர்ந்தெடுத்துப் பிரசுரித்துவிடக்கூடும், அது உங்களுக்கு அவமானமாகிவிடும், வாசகர்கள் உங்களைத் தவறாக நினைக்கக்கூடும்.

அதனால், ஒரு பத்திரிகைக்குப் படைப்பை அனுப்பியபின், ஒரு குறிப்பிட்ட நேரம்வரை காத்திருக்கலாம். அந்த நேரத்துக்குள் உங்கள் படைப்பு தேர்ந்தெடுக்கப்பட்டால் மகிழ்ச்சி, தேர்ந்தெடுக்கப்படவில்லை என்று திரும்பி வந்தாலும் பரவாயில்லை, அதைத் தயக்கமில்லாமல் இன்னொரு பத்திரிகைக்கு அனுப்பிவிடலாம்.

ஒருவேளை, அந்தக் குறிப்பிட்ட நேரம்வரையில் உங்களுக்கு அந்தப் பத்திரிகையிலிருந்து எந்தப் பதிலும் வராவிட்டால், அது தேர்ந்தெடுக்கப்படவில்லை என்று நீங்கள் ஊகித்துக்கொள்ளலாம், அப்போது நீங்கள் அதை இன்னொரு பத்திரிகைக்கு அனுப்பலாம். அப்படிச் செய்யும்போது முதல் பத்திரிகைக்கு ஒரு வரி மின்னஞ்சலோ கடிதமோ எழுதித் தெரிவித்துவிட்டால் இன்னும் நல்லது.

சரி, எவ்வளவு நாள் காத்திருப்பது?

இது ஒவ்வொரு பத்திரிகைக்கும் மாறும். நாளிதழ்கள், வார இதழ்களுக்குச் சுமார் ஒரு மாதம் காத்திருக்கலாம், மாத இதழ்களுக்குச் சுமார் மூன்று மாதங்கள் காத்திருக்கலாம், அதன்பிறகு, அதை வேறு பத்திரிகைக்கு அனுப்புவதுபற்றிச் சிந்திக்கலாம்.

இந்தப் பரிந்துரை நாவல்கள், முழு நூல்களைப் பதிப்பகங்களுக்கு அனுப்புவதற்கும் பொருந்தும், போட்டிகளுக்கு அனுப்பும் கதை, கவிதை, கட்டுரைகளுக்கும் பொருந்தும். போட்டி முடிவு வெளியாகும்வரை அவற்றை வேறு பத்திரிகைகளுக்கு அனுப்பாமல் இருப்பது நல்லது. பல போட்டி அறிவிப்புகளில் இதை ஒரு விதிமுறையாகவே குறிப்பிட்டிருப்பார்கள்.

***

Keywords: Articles, Article, Stories, Story, Short Stories, Short Story, Shortstories, Shortstory, Submissions, Submission, Selection, Rejection, Rejection Letter, Parallel Submission, Concurrent Submission, Magazine, Magazines

உங்களுடைய நூலுக்காகத் திரட்டிய ஆராய்ச்சித் தகவல்களை எத்தனை நாள் பத்திரமாக வைத்திருக்கவேண்டும்?

ஒவ்வொரு புத்தகத்துக்காகவும் நீங்கள் மிகுந்த ஆராய்ச்சியில் ஈடுபடுகிறீர்கள், ஏராளமான தகவல்களைத் திரட்டுகிறீர்கள், அவை பல பக்கங்களுக்கு, பல கோப்புகளுக்கு நீளலாம். நீங்கள் அந்தப் புத்தகத்தை எழுதும்போது அவை மிகவும் உதவியாக இருக்கும்.

ஆனால், புத்தகத்தை எழுதி வெளியிட்டபின் அந்தத் தகவல்களை என்ன செய்வது? தூக்கி எறிந்துவிடலாமா?

‘ம்ஹூம், வேண்டாம். அந்தக் குறிப்புகளை எப்போதும் உங்களுடன் வைத்திருங்கள்’ என்கிறார் பல புகழ் பெற்ற நூல்களின் ஆசிரியரான மாக்ஸ் குந்தர். இதற்கு அவர் சொல்லும் காரணங்கள்:

  1. அந்தப் புத்தகத்தைப்பற்றிப் பின்னர் யாராவது ஏதாவது கேள்வி கேட்டால், அல்லது, உங்கள்மீது சினம் கொண்டு நீதிமன்றத்தில் வழக்கு தொடுத்தால், சான்றுகளை எடுத்துக் காண்பிக்க உதவியாக இருக்கும்.
  2. உங்கள் புத்தகத்தைப்பற்றி மேலும் தெரிந்துகொள்ள விரும்பும் வாசகர்களுக்குப் பதில் அளிக்க உதவியாக இருக்கும்.
  3. அந்தப் புத்தகத்தைப் பின்னாட்களில் நீங்களே மேம்படுத்தி எழுத, அல்லது அது சார்ந்த இன்னொரு நூலை (வேறொரு கோணத்தில்) எழுத இந்தக் குறிப்புகள் மிகவும் உதவும்.
  4. நீங்கள் இந்தத் தலைப்பில் ஒரு நூல் எழுதியிருப்பதால், பத்திரிகைகள் அதுசார்ந்த சிறு தலைப்புகளில் உங்களிடம் கட்டுரை கேட்கலாம், அப்போது நீங்கள் இந்தக் குறிப்புகளை எடுத்துப் பயன்படுத்திக்கொள்ளலாம்.

அதனால், உங்கள் நூலுக்கான குறிப்புகளை எப்போதும் சேமித்துவையுங்கள். இன்றைய டிஜிட்டல் யுகத்தில் இது மேலும் எளிதாகிவிட்டது. உங்களுடைய கோப்புகள் இடத்தை அடைக்குமோ என்று கவலைப்படாமல் கூகுள் டிரைவ் அல்லது டிராப்பாக்ஸில் ஏற்றிப் பத்திரமாக வைத்துவிடலாம்.

தொடர்புடைய இணைப்புகள்:

  • இந்தக் குறிப்பு Nonfiction புத்தகங்கள் எழுதுவது எப்படி என்பதுபற்றி மாக்ஸ் குந்தர் எழுதிய “Writing and Selling a Nonfiction Book” என்ற புத்தகத்தில் இடம்பெற்றுள்ளது. அந்தப் புத்தகம் இப்போது அச்சில் இல்லை.
  • மாக்ஸ் குந்தர் எழுதிய மற்ற நூல்களை இங்கு காணலாம்
  • Nonfiction எழுதுவதுபற்றிய ஒரு பயிற்சி வகுப்பில் கலந்துகொள்ள, இங்கு க்ளிக் செய்யுங்கள்

***

Keywords: Nonfiction, Fiction, Nonfiction Books, Nonfiction Book, Fiction Books, Fiction Book, Research, Book Research, Researching, Data, Notes, Note, Note Taking, Files, Storage, Books, Max Gunther

இணையத்தில் தொடர் எழுத ஏழு நல்ல வழிகள்

தொடர்கதைகள், நாவல்களுக்கு இடையிலான வேறுபாட்டைப்பற்றிச் சமீபத்தில் பேசினோம். (அந்தக் கட்டுரையைப் படிக்க, இங்கு க்ளிக் செய்யுங்கள்). இப்போது, எழுத்தாளராகிய நீங்கள் இணையத்தில் தொடர்களை எழுதுவதற்கு என்னென்ன வாய்ப்புகள் உள்ளன என்று பார்ப்போம்.

இணையம் என்பது ஒரு பெரிய கடலைப்போன்றது. அங்கு தொடர்களை எழுதுவதற்கும் பல வழிகள் இருக்கின்றன. எனினும், அவற்றில் முக்கியமான, எல்லாரும் பயன்படுத்தக்கூடிய ஏழு வழிகளை இங்கு தொகுத்து அளிக்கிறோம்.

1

உங்கள் வலைப்பதிவு (blog) அல்லது சொந்த வலைத்தளத்தில் தொடர் எழுதலாம். ஒவ்வோர் அத்தியாயத்தையும் தனித்தனியாக நாள்தோறும் அல்லது வாரந்தோறும் வெளியிடலாம், வாசகர்கள் முந்தைய அத்தியாயங்களை எளிதில் படிப்பதற்கு வழி அமைத்துத் தரலாம். இதில் இன்னொரு வசதி, வாசகர்கள் கமெண்ட் (கருத்து) அளிக்கவும் வழி உண்டு.

2

உங்கள் ஃபேஸ்புக் பக்கத்தில் தொடர் எழுதலாம். இங்கும் கமெண்ட்ஸ் வசதி உண்டு. ஆனால், முந்தைய அத்தியாயங்களுக்கு இணைப்பு தருவது சற்றுச் சிரமம். அதற்கு நீங்கள் ஹேஷ்டேக் எனப்படும் முறையைப் பயன்படுத்தலாம். எடுத்துக்காட்டாக, உங்கள் தொடரின் பெயர் “அன்பே வா” என்று இருந்தால், #AnbeVaa #AnbeVaaSerial #அன்பேவா #அன்பேவாதொடர் என்பதுபோன்ற ஹேஷ்டேக்ஸை உங்கள் அத்தியாயங்களின் கீழ்ப்பகுதியில் அளிக்கலாம். வாசகர்கள் அதைக் க்ளிக் செய்து மற்ற அத்தியாயங்களைப் படிப்பார்கள்.

3

மின்னஞ்சலில் தொடர் எழுதலாம். இது உங்கள் வாசகர்களை நேரடியாகச் சென்று சேரும். ஆனால், இதற்குக் கொஞ்சம் கூடுதல் உழைப்பு தேவை. அதாவது, வாசகர்களுடைய மின்னஞ்சல் முகவரிகளைத் திரட்டுவது, வாசகர்கள் தாங்களே பதிவு செய்ய வழி உண்டாக்கித் தருவது, அவர்களுக்கு மின்னஞ்சல்கள் சரியாகச் சென்றுசேர்வதை உறுதிசெய்வது போன்றவை. இதற்கான வழிகளை (எடுத்துக்காட்டு: மின்னஞ்சல் குழுக்கள், Newsletters எனப்படும் மின்னஞ்சல் கடிதங்கள்) இணையத்தில் தேடிக் கற்றுக்கொள்ளுங்கள், ஒருமுறை கற்றுக்கொண்டால் பலமுறை பலன் உண்டு.

4

மின்னஞ்சலுக்குப் பதில் வாட்ஸாப், டெலக்ராம் போன்றவற்றையும் நீங்கள் தொடர் எழுதப் பயன்படுத்தலாம். அதாவது, உங்கள் தொடருக்கென்று தனிக் குழு தொடங்கலாம், அல்லது, Broadcast எனப்படும் பரப்பல் தொழில்நுட்பத்தைப் பயன்படுத்தலாம். இங்கும் உங்களுக்கு உடனுக்குடன் கருத்துகள் கிடைத்துவிடும், கதையைக் கொஞ்சம் கொஞ்சமாக மெருகேற்றிச் சிறப்பாக்கலாம்.

5

இணையத்தில் Story Forums எனப்படும் கதை மன்றங்கள் பலவும் உள்ளன. இவற்றில் உங்கள் கதையை ஒவ்வோர் அத்தியாயமாக வெளியிடலாம். இந்த மன்றங்களுக்கு ஏற்கெனவே பல்லாயிரம் வாசகர்கள் இருப்பார்கள் என்பதால், உங்கள் தொடர் எளிதில் அவர்களுக்குச் சென்று சேரும். இந்த மன்றங்கள் கருத்து தெரிவித்தல், பிறரிடம் பகிர்ந்துகொள்ளுதல் போன்றவற்றுக்கும் வசதி உண்டாக்கித் தருவார்கள் என்பதால், நீங்கள் தொழில்நுட்பத்தைப்பற்றிக் கவலைப்படாமல் எழுத்தில் கவனம் செலுத்தலாம்.

6

உங்கள் தொடர் எழுத்து வடிவத்தில்தான் வெளியாகவேண்டும் என்று எந்தக் கட்டாயமும் இல்லை. இணையத்தின் தொழில்நுட்ப வசதியைப் பயன்படுத்திக்கொண்டு வீடியோ, ஆடியோ (ஒலிப் பதிவு) போன்ற வழிகளிலும் உங்கள் தொடரை வெளியிடலாம். இதற்குக் கொஞ்சம் கூடுதல் உழைப்பு (எடுத்துக்காட்டாக, தொடர் அத்தியாயங்களைப் படித்து ஒலிப் பதிவு செய்தல், வீடியோ உருவாக்குதல் போன்றவை) தேவைப்படும். ஆனால், எழுத்து வடிவத் தொடர்களை நெருங்காத பல புதிய வாசகர்கள் உங்களுக்குக் கிடைப்பார்கள்.

இந்த வடிவத்தில் மக்கள் கதைகளைப் படிப்பார்களா என்று ஐயமாக உள்ளதா? இங்கு க்ளிக் செய்து Audible இணையத் தளத்தில் உள்ள கதைகளின் பட்டியலைப் பாருங்கள், நம்பிக்கை வந்துவிடும். ஒலிப் புத்தகங்கள் வெற்றியடையும்போது ஒலித் தொடர்களுக்கும் நல்ல வரவேற்பு இருக்கும்.

7

ஒவ்வோர் அத்தியாயத்தையும் ஒரு குறிப்பிட்ட நேரத்தில் Facebook Live போன்ற ஒரு தொழில்நுட்பத்தைப் பயன்படுத்தி நேரடியாக ஒளிபரப்பலாம். அதை உங்களுடைய சமூக வலைப்பக்கங்களில் அறிவித்து மக்களுடைய ஆதரவைத் திரட்டலாம். இந்த முறையின் மிகப் பெரிய நன்மை, உங்கள் தொடருக்கான கருத்துகள் உடனுக்குடன் கிடைக்கும்.

இதுபோல் உங்கள் மனத்தில் உள்ள தொடர் யோசனைகளை Comments பகுதியில் எழுதுங்கள். அவை எல்லா எழுத்தாளர்களுக்கும் பயன்படும். சேர்ந்து கற்றுக்கொள்வோம், உங்கள் தொடருக்கு வாழ்த்துகள்.

***

Keywords: Novels, Novel, Serials, Serial, Series, Story Series, Cliffhanger, Facebook, YouTube, Podcasts, Video Serials, Audio Serials, Audio Episodes, Video Episodes, Podcast, Audio Episode, Video Episode, Video Serial, Audio Serial, Facebook, Facebook Live, Email Groups, WhatsApp Groups, Telegram Groups, Forums, Chapters, Chapter, Episodes, Episode

நாவலுக்கும் தொடர்கதைக்கும் என்ன வேறுபாடு?

எழுத்தாளர்கள் எழுதும் பெரிய கதைகளை நூலாக வெளியிடும்போது “நாவல்” அல்லது “புதினம்” என்று அழைக்கிறோம். அந்தக் கதைகளில் சில, பத்திரிகைகளில் தொடர்களாகவும் வெளிவருகின்றன. அப்போது அவற்றைத் “தொடர்கதை” என்று அழைக்கிறோம். இந்த இரண்டும் ஒன்றுதானா?

தொடர் என்பது பத்திரிகைகளின் வசதிக்காக அமைந்த ஒன்று. அதாவது, ஒரே கதையை மொத்தமாகத் தந்து சலிப்பை உண்டாக்குவதைவிட, அதை வாரம் கொஞ்சமாகப் பிரித்துத் தருவார்கள், அத்துடன், ஆர்வத்தைத் தூண்டி வாசகரைத் திரும்பத் திரும்பத் தங்கள் பத்திரிகையை வாங்க வைப்பார்கள்.

இவ்வகைத் தொடர்கள் கதைகளுக்குதான் என்று இல்லை, தொடர் கட்டுரைகள் உண்டு, தொடர் கவிதைகள் உண்டு, இன்னும் பலவகைத் தொடர்கள் இருக்கின்றன.

ஆக, ஒரு நாவல் தொடராக எழுதப்படுகிறது, இன்னொரு நாவல் மொத்தமாக ஒரே நேரத்தில் எழுதப்படுகிறது என்கிற காரணத்தால் அவை இரண்டும் வெவ்வேறாகிவிடாது. அவற்றுக்கான அடிப்படை எழுத்து உத்திகள் ஒன்றுதான்.

எனினும், தொடராக வெளியாகும் நாவல்களுக்குச் சில கூடுதல் அம்சங்கள் உண்டு. எடுத்துக்காட்டாக, தொடர்கதைகளின் ஒவ்வோர் அத்தியாயத்தின் நிறைவிலும் வாசகரைத் தக்கவைத்துக்கொள்வதற்காக ஓர் அதிர்ச்சியான, வியப்பான, எதிர்பாராத ஒரு விஷயத்தை வைப்பது வழக்கம். ஆங்கிலத்தில் இதை Cliffhanger என்பார்கள். இது நாவல்களுக்குப் பெரும்பாலும் தேவைப்படாது, இருந்தாலும் பிழை இல்லை.

அதேபோல், தொடர்கதைகளில் ஒவ்வோர் அத்தியாயமும் கிட்டத்தட்ட ஒரே அளவில் இருக்கவேண்டும். நாவல்களில் அவை எப்படி வேண்டுமானாலும் அமையலாம்.

நீங்கள் ஒரு நாவல் எழுதினாலும் சரி, தொடர்கதை எழுதினாலும் சரி, அதற்கான ஆராய்ச்சி, தயாராதல் என அனைத்தும் கிட்டத்தட்ட ஒரேமாதிரிதான் அமையும். தொடராக எழுதும்போது அந்தப் பத்திரிகையின் தேவைகளை அறிந்து அதற்கேற்பச் சில கூடுதல் விஷயங்களைச் செய்வீர்கள், அவ்வளவுதான். பின்னர் அதைத் தொகுத்து நாவலாக வெளியிடும்போது, தேவைப்பட்டால் அந்த சில அம்சங்களை நீக்கிவிட்டுக்கூட வெளியிடலாம், அப்படியே வெளியிட்டாலும் பிரச்சனை இருக்காது.

உங்களுக்குப் பிடித்த நாவல்கள், தொடர்கதைகளைப்பற்றி Comments பகுதியில் சொல்லுங்கள்!

***

Keywords: Novels, Novel, Serials, Serial, Series, Story Series, Cliffhanger, Chapters, Chapter, Episodes, Episode

வாசகர் பார்வையிலிருந்து எழுதுங்கள்: சொல்கிறார் வாரன் பஃபெட்

உலகின் மிகச் சிறந்த முதலீட்டாளர்களில் ஒருவர், நிதி, தொழில் சார்ந்த சிந்தனையாளர் வாரன் பஃபெட். அவரைப் பார்த்து முதலீட்டுத் துறைக்குள் வந்தவர்கள், வந்துகொண்டிருப்பவர்கள் ஏராளம்.

அது சரி, ‘எழுதுவோம்’ தளத்தில் அவர் ஏன் வருகிறார் என்று கேட்கிறீர்களா? காரணம் இருக்கிறது.

கடந்த பல ஆண்டுகளாகத் தன்னுடைய பங்குதாரர்களுக்குச் சிறப்பான கடிதங்களை எழுதிவருகிறார் வாரன் பஃபெட். அவற்றை எல்லாவிதமான மக்களும் படித்துப் பயன் பெறுகிறார்கள். அப்படியானால், எழுத்தாளர்களாகிய நாமும் அவரிடம் கற்றுக்கொள்ள ஓரிரு விஷயங்கள் இருக்குமில்லையா?

‘நான் எழுதும்போது வாசகருடைய பார்வையில் என்னை வைத்துக்கொள்வேன்’ என்கிறார் வாரன் பஃபெட். அதாவது, அவர் வாசகராக இருந்தால் அந்தக் கடிதத்தில் அல்லது கட்டுரையில் என்னவெல்லாம் எதிர்பார்ப்பார் என்பதை முதலில் சிந்திக்கிறார், பிறகு, அவை அனைத்தையும் அழகாகத் தொகுத்து எழுதிவிடுகிறார், மக்களும் அதைக் கொண்டாடிப் படிக்கிறார்கள்.

எளிய வழிமுறைதான், ஆனால், பின்பற்றக் கடினமானது, பின்பற்றினால் மிகப் பெரிய வெற்றியைத் தரக்கூடியது: வாசகருடைய பார்வையில் இருந்து எழுதுதல், வாசகரைப் புரிந்துகொள்ளுதல், அவர் எதிர்பார்க்கிறவற்றை நம் படைப்பில் வழங்குதல். இவை அனைத்தையும் வாரன் பஃபெட்டிடம் கற்றுக்கொள்வோம்.

வாரன் பஃபெட் எழுதிய புகழ் பெற்ற பங்குதாரர் கடிதங்களின் தொகுப்பு நூலைப் படிக்க, இங்கு க்ளிக் செய்யுங்கள்

***

Keywords: Warren Buffett, Berkshire Hathaway, Investor, Writer, Writers, Authors, Author, Writing, Investment, Advice, Reader, Reader Perspective

உங்கள் கதையில் எத்தனைப் பாத்திரங்கள் இருக்கலாம்?

சிறுகதைகள், குறுநாவல்கள், நாவல்கள் எழுதும்போது அவற்றில் உள்ள கதாபாத்திரங்கள் (கதை மாந்தர்கள்) எண்ணிக்கையைப்பற்றிப் பலருக்கு ஐயம் எழும். ‘ஒருவேளை நான் நிறையப் பேரைக் கதையில சேர்த்துக் குழப்பறேனோ’ என்று யோசிப்பார்கள். அல்லது, ‘இதுல வர்ற ஆளுங்க போதாதோ’ என்று கவலைப்படுவார்கள்.

உண்மையில், ஒரு கதைக்கு ஏற்ற பாத்திரங்களின் எண்ணிக்கையை எப்படித் தீர்மானிப்பது?

இங்கு எண்ணிக்கையைவிடத் தரம்தான் முக்கியம். அதாவது, ஏராளமான கதை மாந்தர்களைச் சேர்த்து அவர்கள் ஒவ்வொருவரையும் வாசகர் மனத்தில் தங்கச் செய்வதும் சாத்தியம், குறைந்த கதை மாந்தர்களை வைத்துக்கொண்டு வாசகர்கள் அவர்களைச் சிறிதும் கண்டுகொள்ளாதபடி ஆக்குவதும் சாத்தியம். தரம் இருந்தால் எல்லாம் சரியாக அமையும்.

அதனால், உங்கள் கதையை இன்னொரு முறை இந்தக் கோணத்தில் பாருங்கள். அதிலுள்ள ஒவ்வொரு பாத்திரத்தைப்பற்றியும் சில கேள்விகளைக் கேளுங்கள்:

  • இந்தப் பாத்திரம் இந்தக் கதைக்கு முக்கியமா?
  • இதை நீக்கிவிட்டால் என்ன ஆகும்? (எதுவும் ஆகாது என்றால், அது தேவையில்லாத பாத்திரம் என்று பொருள்)
  • இந்தப் பாத்திரத்துக்கு இப்போது நான் தந்திருக்கும் முக்கியத்துவம் போதுமா? அதைக் கூட்டவேண்டுமா அல்லது குறைக்கவேண்டுமா?
  • ஒவ்வொரு பாத்திரத்துக்கும் தேவையான அளவு பின்னணி, அழுத்தம் இருக்கிறதா? அந்தப் பாத்திரத்தின் தன்மையை நான் நன்கு புரிந்துகொண்டிருக்கிறேனா? அதைச் சரியாக எழுத்தில் கொண்டுவருகிறேனா? இந்தப் பாத்திரம் வெளிப்படும் தன்மையில் ஏதும் முரண்கள் இருக்கின்றனவா?
  • இந்தப் பாத்திரம் வாசகர் மனத்தில் உருவாக்கவேண்டும் என்று நான் நினைக்கிற உணர்வு என்ன? அதைக் கதை சரியாகச் செய்கிறதா?
  • நான் ஒரே காட்சியில் பல பாத்திரங்களைச் சேர்த்துக் குழப்பம் உண்டாக்குகிறேனா? ஆம் எனில், அவற்றைப் பல காட்சிகளாகப் பிரிப்பது சாத்தியமா? இயலாது என்றால், பாத்திரங்களுக்குள் குழப்பம் வராதபடி எழுதுவது எப்படி?

இப்படிப் பாத்திரங்களைச் சிந்திப்பதற்காகவே உங்கள் கதையை இன்னொருமுறை புரட்டுங்கள். எழுதுமுன்பே இவற்றைச் சிந்தித்துவிட்டு எழுதத் தொடங்கினால் இன்னும் சிறப்பு.

உங்கள் கதையைப் படிக்கும் வாசகர்களிடமும் உங்கள் பாத்திரங்களைப்பற்றிப் பேசுங்கள். அவர்களுக்குப் பிடித்த, பிடிக்காத பாத்திரங்கள் எவை, ஏன் என்று விசாரியுங்கள். இதுவும் உங்களுடைய பாத்திரத் தேர்ந்தெடுத்தலுக்கு உதவும்.

நல்ல பாத்திரங்கள் உங்கள் கதைகளைப் பெரிய உயரங்களுக்குக் கொண்டுசெல்லும். வாசகர்கள் அந்தப் பாத்திரங்களை (உங்களையும்தான்) நன்கு கொண்டாடுவார்கள். அப்படிப்பட்ட பாத்திரங்களை நீங்கள் உருவாக்கி வெற்றிபெற வாழ்த்துகள்.

***

Keywords: Novels, Novel, Short Stories, Short Story, Shortstories, Shortstory, Novelettes, Novelette, Stories, Story, Fiction, Fictional Stories, Fictional Characters, Characters, Character, Fictional Story Characters, Number of Characters, Character Sketch, Balance

உங்கள் புத்தகங்களுக்குச் சிறந்த அட்டைப்படங்களை உருவாக்க உதவும் புதிய தளம் Coverjig

உங்களுடைய புத்தகங்களை வாசகர்களிடம் கொண்டுசேர்க்கின்ற முதல் கருவிகளில் ஒன்று, நல்ல அட்டைப்படம். அதைமட்டும் வைத்து யாரும் வாங்குவதில்லை என்றாலும், பல நூல்களில் எதைத் தேர்ந்தெடுக்கலாம் என்று வாசகர்கள் தீர்மானிக்க அதுவும் உதவுகிறது.

நல்ல அட்டைப்படத்தை வடிவமைப்பதற்கு நீங்கள் ஒரு வடிவமைப்பாளருடன் (Designer) பணியாற்றவேண்டியிருக்கும். அல்லது, இதற்கென்று உள்ள இணைய மென்பொருள்களைப் பயன்படுத்தி எளிதில் அட்டைப்படம் வடிவமைக்கலாம்.

அவ்வகையில் இணையத்தில் அறிமுகமாகியுள்ள புதிய தளம், Coverjig. யார் வேண்டுமானாலும் சில க்ளிக்குகளில் உங்கள் புத்தகத்துக்கான அழகான அட்டையை இங்கு வடிவமைத்துவிடலாம். இது உண்மையில் வணிகத் தளம்தான் என்றாலும், இப்போதைக்குத் தங்கள் சேவையை இலவசமாக வழங்குகிறார்கள், பயன்படுத்திப் பாருங்கள்.

ஆனால் ஒன்று, மற்ற பல தளங்களைப்போல் இந்தத் தளம் ஆங்கிலத்தில்தான் வேலை செய்கிறது. தமிழில் அட்டை வடிவமைத்தாலும் பின்னர் Export செய்யும்போது அது வெறும் பெட்டியாகதான் வருகிறது. இந்தப் பிழையை Coverjig குழுவினருக்குச் சொல்லுங்கள், அவர்களுடைய மென்பொருளில் தமிழுக்கும் ஆதரவு வேண்டும் என்று கேளுங்கள். அதற்கு நீங்கள் இங்கு க்ளிக் செய்யவேண்டும்.

Coverjig இணையத் தளத்தைப் பயன்படுத்தி இலவசமாகவும் எளிதாகவும் அட்டை வடிவமைக்க, இங்கு க்ளிக் செய்யுங்கள்.

உங்கள் நூல்களின் வடிவமைப்புப் பணிகளுக்கு உதவக்கூடிய இன்னொரு தளத்தைப்பற்றி இங்கு எழுதியுள்ளோம்: உங்கள் நூல்கள், இணையத் தளத்தை அழகுபடுத்த உதவும் Creative Fabrica இணையத் தளம்

***

Keywords: Book Wrapper, Book Cover, Wrappers, Wrapper, Wrapper Design, Cover Design, Designer, Coverjig

சிறுகதைகள், நாவல்களில் உண்மை நிகழ்வுகள் வரலாமா?

எழுத்தைப் புனைவு (Fiction), புனைவற்றவை/அபுனைவு (Nonfiction) என்று பகுக்கிறோம். இதன் பொருள், கதை, நாவல், குறுநாவல், கவிதை, நாடகம் போன்றவை புனைந்து உருவாக்கப்படுகிறவை, அவற்றில் கற்பனை இருக்கலாம், சில நேரங்களில் அவை முழுக் கற்பனையாகக்கூட இருக்கலாம் (எடுத்துக்காட்டு: அறிவியல் புனைகதைகள்). ஆனால், புனைவற்ற/அபுனைவு நூல்களில் எந்தக் கற்பனையும் இருக்கக்கூடாது.

ஆனால், சிறுகதைகள், நாவல்கள், குறுநாவல்களில் உண்மை நிகழ்வுகள் வரலாமா?

உண்மையில், பெரும்பாலான புனைவுகள் நடந்த ஒரு நிகழ்வு அல்லது மனிதரைப் பின்னணியாகக் கொண்டுதான் எழுதப்படுகின்றன. நேரடியாகப் பார்த்தவை, செய்தித்தாள்களில், நூல்களில் படித்தவை, பிறர் சொல்லக் கேட்டவை, ஆராய்ச்சியின்மூலம் அறிந்தவை, கல்வெட்டுகள், செப்பேடுகளில் கண்டவை என்று பலவிதமான உண்மைகள் புனைவுகளுக்கு அடிப்படையாக இருக்கின்றன. அதில் எந்தப் பிழையும் இல்லை.

அதே நேரம், அந்த உண்மைகளோடு புனைவுகளைக் கலந்து எழுதும்போது, இது புனைவுதான், உண்மை இல்லை என்பதைத் தெளிவாகச் சொல்லிவிடவேண்டும். இல்லாவிட்டால் நேர்மையான மனிதர் ஒருவர் திருட்டுத்தனமான வேலையொன்றைச் செய்தார் என்பதுபோன்ற கற்பனையை நீங்கள் எழுதப்போக, நாளைக்கு அதை மக்கள் உண்மையாக நம்பிவிடக்கூடும், அதனால் அந்த மனிதருடைய பெயருக்கு இழுக்கு ஏற்படக்கூடும்.

அதனால், புனைவு நூல்களுக்கு ஆராய்ச்சி செய்யும்போது உண்மை நிகழ்வுகளைச் சரியானபடி முன்வைக்கவேண்டும், தகவல்களைப் பயன்படுத்திக்கொள்ளலாம், ஆனால், எது கற்பனை என்பதைத் தெளிவுபடுத்தவேண்டும். தேவைப்பட்டால், ‘இந்த நூலில் சில உண்மை நிகழ்வுகள், மனிதர்கள் இடம்பெற்றிருந்தாலும், இது அந்த நிகழ்வுகளின், மனிதர்களின் கதை இல்லை. இதைக் கற்பனைப் படைப்பாகவே கருதுங்கள்’ என்பதுபோல் ஒரு பொறுப்பு துறப்பை (Disclaimer) நூலில் சேர்க்கலாம். அல்லது, அந்த உண்மை நிகழ்வு, மனிதரின் சாயல் தெரியாதபடி கற்பனையைப் பயன்படுத்தலாம்.

உங்களுக்குப் பிடித்த புனைவு நூல்கள் எவை? அவற்றில் உண்மைகள் கலந்திருக்கின்றனவா? ஆம் எனில், எந்த விகிதத்துக்குக் கலந்திருக்கின்றன? எப்படிக் கலந்திருக்கின்றன? அது நூலுக்கு எப்படி உதவுகிறது?… இதையெல்லாம் ஆராய்ந்து பாருங்கள், கற்றுக்கொள்ளுங்கள், அது உங்கள் எழுத்தை இன்னும் சிறப்பாக்கும்.

***

Keywords: Fiction, Short Stories, Shortstories, Short Story, Shorstory, Novel, Novels, Novelette, Novelettes, Research, Researching, Nonfiction, Truth, True, True Story, True Stories, True Novel, True Novels, Novels based on truce incidents, Stories based on true incidents, True incidents, true incident, Fact, Facts, Fact Vs Fiction, Facts Vs Fiction, Facts in Fiction