Alpha Readers – எழுதுவோம்

உங்களுடைய Sensitivity Reader யார்?

உங்களுடைய கதை, கட்டுரை, நூல் போன்றவற்றை எழுதியதும் பிறரிடம் கொடுத்துப் படிக்கச் சொல்வீர்கள், அவர்கள் சொல்லும் கருத்துகளைச் சிந்தித்து, தேவையான திருத்தங்களைச் செய்வீர்கள், அதன்பிறகுதான் பதிப்பிப்பீர்கள். அது ஒரு நல்ல பழக்கம், உங்கள் படைப்பைச் சிறப்பாக ஆக்குகிற உத்தி.

ஏனெனில், எழுதுகிற நம்முடைய பார்வையும் வாசகருடைய பார்வையும் ஒரேபோல் இருப்பதில்லை. அதனால், நாம் ஒரு குறிப்பிட்ட வகையில் சிந்தித்த படைப்பைப் பிறர் எப்படிப் பார்க்கிறார்கள் என்பதை அறிந்து அதன்படி செயல்படுவது நல்லது.

ஆனால், இப்படிப் பிறருடைய கருத்துகளைப் பொதுவாகக் கேட்பதுமட்டும் போதாது, அதில் ஒருவராவது Sensitive Readerஆக இருக்கவேண்டும் என்கிறார்கள் வல்லுனர்கள்.

அதென்ன Sensitive Reader?

Sensitive என்ற ஆங்கிலச் சொல்லுக்கு அகரமுதலி சொல்லும் பொருள் இது:

Quick to detect or respond to slight changes, signals, or influences

தமிழில் இதை நுண்ணுணர்வு என்று கூறலாம். அதாவது, படைப்பில் நுட்பமாக வெளிப்படக்கூடிய, பிறரை நல்லமுறையில் அல்லது கெட்டமுறையில் பாதிக்கக்கூடிய விஷயங்களை அடையாளம் காண்பது.

எடுத்துக்காட்டாக, உங்கள் கதையில் காது கேட்காதவர்களைக் கேலி செய்து ஒரு வரி இருக்கிறது என்று வைத்துக்கொள்வோம். எழுதும்போது நீங்கள் அதை ஒரு நகைச்சுவையாக எண்ணியிருக்கலாம். ஆனால், உண்மையில் காது கேட்காத ஒருவர் அதைப் படிக்கும்போது மனம் வருந்தக்கூடும். இதுபோன்றவற்றை அடையாளம் கண்டு சுட்டிக்காட்டுகிறவர்தான் Sensitivity Reader, அதாவது, நுண்ணுணர்வுள்ள வாசகர்.

இங்கு காது கேளாமை என்பது ஓர் எடுத்துக்காட்டுதான். இதேபோல் பெண்களை, குள்ளமானவர்களை, மெதுவாக நடக்கிறவர்களை, ஒரு குறிப்பிட்ட இனத்தைச் சேர்ந்தவர்களைக் கேலி செய்கிற விஷயங்கள் உங்களையும் அறியாமல் உங்கள் படைப்பில் இடம்பெற்றுவிடலாம். எல்லாருக்கும் எழுதுகிற நீங்கள் இதுபோன்ற விஷயங்களைத் தவிர்ப்பதற்கு ஒரு Sensitivity Reader உதவுவார், பிரச்சனையை உங்களுக்குப் புரியவைத்துத் திருத்துவார்.

அதனால், உங்களுடைய படைப்புகளை வெளியிடுமுன் நுண்ணுணர்வுள்ள வாசகர் ஒருவரிடம் படிக்கக் கொடுங்கள். அப்படி ஒருவர் உங்கள் வட்டத்தில் இல்லை என்றால், அவரைக் கண்டறியுங்கள். அதைவிட முக்கியம், அவர் சொல்லும் கருத்துகளைக் கூர்ந்து கவனித்து, வருங்காலத்தில் உங்கள் எழுத்தில் அந்தப் பிரச்சனைகள் வராமல் பார்த்துக்கொள்ளுங்கள்.

நீங்கள் Sensitive Reader ஆக விரும்புகிறீர்களா? அதைக் கற்றுத்தரும் புத்தகம் ஒன்று இங்கு உள்ளது.

***

Keywords: Readers, Reader, Reviewers, Reviewer, Review, Reading, Reviewing, Comments, Comment, Commenting, Feedback, Feed back, Sensitive, Sensitivity, Sensitive Reader, Sensitivity Reader, Sensitive Reader, Sensitivity Readers, Alpha Reader, Alpha Readers, Beta Reader, Beta Readers

எழுத்தாளர்கள் விமர்சனங்களைப் பொருட்படுத்தவேண்டுமா?

எழுத்தாளர்களுடைய முன்னேற்றத்துக்கு, அவர்களுடைய எழுத்துகள் சிறப்பாக அமைவதற்கு விமர்சனங்கள் மிகவும் முக்கியம். நூலைப் படித்து அதை இன்னும் சிறப்பாக்குவதற்கு என்ன செய்யலாம் என்று ஆக்கப்பூர்வமான விமர்சனங்களை முன்வைக்கிற விமர்சகர்களை நாம் கொண்டாடவேண்டும், அவர்களுடைய கருத்துகளைக் கேட்டு, உரியவற்றை மாற்றிக்கொள்ளவேண்டும், மற்றவற்றை மறந்துவிடலாம்.

அதனால்தான், நம்முடைய எழுதுவோம் தளத்திலும் எழுத்துபற்றிய அனைத்துத் தளங்களிலும் விமர்சனங்களைப் பெறுவது, அவற்றைப் பயன்படுத்திக்கொள்வது ஆகியவற்றுக்கு மிகுந்த முக்கியத்துவம் அளிக்கப்படுகிறது. Alpha Readers, Beta Readers என விமர்சகர்களைப் பிரித்து அவர்களுக்கு உங்கள் படைப்புகளை முதலில் படிக்கக் கொடுங்கள் என்று வலியுறுத்துகிறோம். எழுதுபவர், எடிட் செய்பவருக்குத் தெரியாத பல குறைகள், மேம்பாடுகள் இவர்களுக்குத் தெரியக்கூடும், அவை நூலைச் சிறப்பாக்கும்.

புத்தகம் வெளியானபிறகும், அமேசான் போன்ற தளங்களில் அதற்கு எழுதப்படும் விமர்சனங்களை எழுத்தாளர்கள் ஊன்றிக் கவனிக்கிறார்கள். அதிலிருந்து பல விஷயங்களைக் கற்றுக்கொண்டு தங்களுடைய வருங்காலப் புத்தகங்களில் செயல்படுத்துகிறார்கள்.

எனினும், எல்லா விமர்சனங்களும் இப்படி ஆக்கப்பூர்வமாக அமைவதில்லை. சும்மா வீம்புக்கென்று திட்டுகிறவர்கள் இருக்கிறார்கள். இவர்களை எண்ணி மனம் வருந்திக்கொண்டிருந்தால் எழுதுவதற்கு ஏது நேரம்? புறந்தள்ளிவிட்டுச் செல்லப் பழகவேண்டும்.

இந்தக் கோணத்தில் சிந்திக்கும்போது, இன்று ட்விட்டரில் படித்த ஒரு சுவையான கருத்தை உங்கள் பார்வைக்கு வைக்கிறோம்:

பல நேரங்களில், உங்களை விமர்சிக்கிறவர்கள் உங்களைவிடக் குறைவாகப் படைத்துக்கொண்டிருப்பவர்களாக இருப்பார்கள்.

: ஶ்ரீராம்

***

Keywords: Writers, Authors, Criticism, Review, Comments, Feedback, Reviews, Book Review, Book Reviews, Critics, Reviewers, Critic, Reviewer, Feedback Provider, Reader, Alpha Reader, Beta Reader, Readers, Alpha Reader, Beta Readers, Books, Book, Ebooks, Ebook, Creativity

உங்கள் எழுத்தில் வேகத்தைக் கூட்டுவதற்கு 8 வழிகள்

விறுவிறுவென்று ஓடும் எழுத்தைத்தான் வாசகர்கள் விரும்புகிறார்கள். அது கதையானாலும் சரி, கட்டுரையானாலும் சரி, எழுத்தில் வேகம் இருக்கவேண்டும் என்பது ஒரு குறைந்தபட்சத் தேவையாக இருக்கிறது.

யோசித்துப்பாருங்கள், நாம் படித்த, நமக்குப் பிடித்த எழுத்துகள் அனைத்தும் இப்படி வேகமாக ஓடுகிறவையாகதான் இருந்திருக்கும். நின்று நிதானமாகச் சிந்திக்கவைக்கும் எழுத்துகள் வேறு விதம். ஆனால், பெரும்பாலான எழுத்துகள் விரைவினால்தான் கவனத்தை ஈர்க்கின்றன.

சரி, நம்முடைய எழுத்தில் வேகத்தைக் கூட்டுவது எப்படி? அதற்கு 8 சிறந்த வழிகள், இதோ:

சிறிய பத்திகள் (பேராக்கள்), அதில் சிறிய வாசகங்கள் என்று அமையுங்கள். அவ்வப்போது ஒரு மாறுதலுக்காகப் பெரிய வாசகஙகள் வரலாம். அதுவும் வேகத்தைக் கூட்டத்தான் செய்யும்.
விவரிப்புகளை ரொம்ப நீட்டாமல் சுருக்கமாகவும் சுவையாகவும் அமையுங்கள். ஒரு திரைப்படக் கேமெராமேன் காட்சிகளைச் சட்டென்று வெட்டி வெட்டிக் காட்டுகிற பாணியை எழுத்தில் கொண்டுவாருங்கள்.
பழைய, புளித்துப்போன பயன்பாடுகள், உவமைகளைத் தவிர்த்துவிடுங்கள், அதற்குப்பதில் புதுமையாக என்ன சொல்லலாம் என்று யோசியுங்கள். எடுத்துக்காட்டாக, இந்தக் குறிப்பில் உள்ள ‘புளித்துப்போன’ என்ற பயன்பாடுகூட ஒரு பழைய பயன்பாடுதான். அதற்குப் பதில் என்ன சொன்னால் சுவையாக இருக்கும்?
உங்களைச் சுற்றியுள்ள மக்களைக் கவனியுங்கள். பெரும்பாலானோர் வளவளவென்று பேசுவதில்லை; சுருக்கமாகவும் சுவையாகவும் பேசுகிறார்கள்; அதுதான் உலக இயல்பு; அதை எழுத்தில் கொண்டுவாருங்கள். (ஒருவேளை, வளவளவென்று பேசுகிறவர்களை நீங்கள் சந்தித்தால், அவர்களிடமிருந்தும் கற்றுக்கொள்ளலாம். அதாவது, எப்படி எழுதக்கூடாது என்பதைக் கற்றுக்கொள்ளலாம்.)
விறுவிறுவென்று ஓடும் எழுத்துக்குச் சொந்தக்காரர்கள் என்று நீங்கள் சில எழுத்தாளர்களை நினைத்திருப்பீர்கள். அவர்களுடைய எழுத்துகளை மீண்டும் படியுங்கள். அவர்கள் என்ன செய்கிறார்கள் என்று சிந்தியுங்கள். அவற்றைக் காப்பியடிக்காமல் அந்த உத்திகளை உங்கள் பாணியில் பயன்படுத்துங்கள்.
வாசகர்களுடைய கருத்துகளைக் கேளுங்கள். எழுத்து வெளியாகுமுன்பும் சரி, வெளியானபின்பும் சரி, கருத்துகளைத் திரட்டலாம். பெரும்பாலும் எங்கு தொய்வு விழுகிறது என்று அவர்கள் சொல்லிவிடுவார்கள். அதன்படி வேண்டிய திருத்தங்களைச் செய்யுங்கள்.
நினைத்ததையெல்லாம் எழுதாமல் திட்டமிட்டு எழுதுங்கள். அப்போது, எங்கு வேகம் தேவைப்படுகிறது என்று நீங்கள் உணர்ந்துகொண்டுவிடலாம், அதைத் திட்டத்தில் அல்லது எழுத்தில் சரிசெய்துவிடலாம்.
எழுதியதைக் கண்டிப்பாக ஒரு முறைக்கு இருமுறை படித்துப் பாருங்கள், திருத்துங்கள், கச்சிதமாகவும் சிறப்பாகவும் ஆக்கியபின்தான் பதிப்பிக்க அனுப்புவேன் என்று உறுதியாக இருங்கள்.

உங்களுடைய எழுத்தில் இந்த முறைகளைப் பயன்படுத்திப்பாருங்கள். உங்கள் வாசகர்களுடைய முகத்தில் தெரியும் மகிழ்ச்சிப் பரவசத்தை அனுபவியுங்கள்!

அத்துடன், எழுத்தில் வேகத்தைக் கூட்டுவதற்கு உங்களுக்குத் தோன்றும் வழிகளையும் சொல்லுங்கள். எழுதுவோம், கற்றுக்கொள்வோம்.

Keywords: Writing, Writers, Authors, Speed, Pace, Quick, Best Practices, Tips

நண்பர் நாள் வாழ்த்துகள்!

Happy Friendship Day! நண்பர் நாள் வாழ்த்துகள்!

நண்பர்கள் எல்லாருக்கும் முக்கியம். குறிப்பாக, எழுத்தாளர்களுக்கு இன்னும் முக்கியம். உங்களுடைய படைப்புகளை முதலில் படித்துப் பயனுள்ள கருத்துகளைத் தந்து உதவுகிற Alpha Readers, Beta Readers எல்லாம் அவர்கள்தானே?

நண்பர்களை, நட்பைக் கொண்டாடுவோம்!