உங்கள் நூல் நிராகரிக்கப்பட்டால் என்ன செய்வீர்கள்?

நம்முடைய படைப்பு ஒன்று யாராலாவது நிராகரிக்கப்பட்டால், அது ஒரு மாற்றமுடியாத தீர்ப்பு என்று எண்ணவேண்டியதில்லை என்கிறார் திரை எழுத்தாளர், இயக்குநர் Brian Koppelman. அதற்குப்பதிலாக, அந்த நிராகரிப்பையும் நம்முடைய படைப்பையும் எதிரெதிரில் வைத்துச் சிந்திக்கவேண்டும் என்கிறார்:

  • இவர் X என்ற காரணத்தால் என்னுடைய படைப்பை நிராகரிக்கிறார்
  • என்னுடைய படைப்பில் X இருக்கிறதா?
  • இல்லை என்றால், அந்த நிராகரிப்பை நாம் நிராகரித்துவிடலாம்
  • இருக்கிறது என்றால், X ஒரு பிரச்சனையா?
  • பிரச்சனையில்லை என்றால், அந்த நிராகரிப்பை நாம் நிராகரித்துவிடலாம். எடுத்துக்காட்டாக, நாம் காமெடிக் கதை எழுதியிருக்கும்போது “அதில் லாஜிக் இல்லை” என்ற காரணத்தால் ஒருவர் நிராகரித்தால், அதைப் பொருட்படுத்தவேண்டியதில்லை.
  • பிரச்சனைதான் என்றால், இதை நான் சரி செய்ய இயலுமா?
  • சரி செய்ய இயலும் என்றால், சரி செய்து மீண்டும் அவரிடமோ இன்னொருவரிடமோ சமர்ப்பிக்கலாம்
  • சரி செய்ய இயலாது என்றால், அதை ஓரமாக வைத்துவிட்டு, இந்த அனுபவத்தை ஒரு பாடமாக எடுத்துக்கொண்டு அடுத்த வேலையைப் பார்க்கலாம்

இப்படி நிராகரிப்பு என்பது ஒரு (நல்ல) மாற்றத்துக்கு வழிவகுக்கவேண்டும், அதை வெறும் தீர்ப்பாகப் பார்த்து மனம் வருந்துவதில் எந்தப் பயனும் இல்லை என்கிறார் பிரயன்.

‘தோல்விதான் வெற்றிக்கு முதல் படி’ என்கிற நம் ஊர்ப் பொன்மொழிகூட இந்த வகைதான் என்று நினைக்கிறேன். திரும்பத் திரும்ப ஒரேமாதிரி செய்து தோற்றுக்கொண்டே இருந்தால் வெற்றி வந்துவிடாது, அந்தத் தோல்வியைக் கொஞ்சம் ஆராய்ந்து பார்த்துப் பாடம் கற்றுக்கொண்டு வேறுவிதமாக முயன்றால்தான் அது வெற்றிக்கு முதல் படி.

***

Keywords: Rejection, Rejections, Failure, Failures, Success, Handling Rejection, Handling Rejections, Rejection Letter, Rejected Script, Rejected Manuscript, Rejected Book, Book Rejected

மதிப்புள்ள சகோதரன்

புகழ் பெற்ற ரஷ்ய எழுத்தாளர் ஆன்டன் செக்காவுடைய தம்பி மிஹைல் அவருக்கு ஒரு கடிதம் எழுதுகிறார். அதில் “இப்படிக்கு, உங்கள் மதிப்பில்லாத, முக்கியத்துவமில்லாத சகோதரன்” என்று எழுதிக் கையொப்பமிடுகிறார்.

இந்த வரி ஆன்டனுக்குப் பிடிக்கவில்லை. “ஏன் அப்படி எழுதுகிறாய்?” என்று தம்பியைக் கடிந்துகொள்கிறார், “கடவுளுக்கு முன்னால் உன்னுடைய முக்கியத்துவமின்மையை உணரலாம்; அழகுக்கு முன்னால், அறிவுக்கு முன்னால், இயற்கைக்கு முன்னால் நாம் முக்கியத்துவமற்றவர்கள் என்று எண்ணலாம். ஆனால், மனிதர்களுக்கு முன்னால் நாம் நம்மை முக்கியத்துவம் இல்லாதவர்களாக எண்ணக்கூடாது.”

“நீ ஏன் உன்னை அப்படி நினைத்துக்கொள்கிறாய்? நீ என்ன பொறுக்கியா? நேர்மையான ஆள்தானே? அப்படியானால், நான் ஒரு நேர்மையான மனிதன் என்று உன்னை நீயே மதிக்கத் தொடங்கு, அப்போது, பிறருக்கு முன்னால் உன்னை மதிப்பற்றவனாக எண்ணமாட்டாய்.”

“பணிவுடன் இருப்பது வேறு, நம்மை நாமே மதிப்பற்றவர்களாக எண்ணிக்கொள்வது வேறு, இரண்டையும் ஒன்றாக்கிக் குழப்பிக்கொள்ளாதே.’

என்ன அழகான அறிவுரை! இந்த உலகத்தில் எல்லாரும் ஒவ்வொரு விதத்தில் மதிப்புள்ளவர்கள்தான் என்பதை உணர்த்தும் “எறும்பும் தன் கையால் எண் சாண்” என்ற பழைய பாடல் நினைவுக்கு வருகிறது. தாழ்வு மனப்பான்மை கொண்ட எல்லாருக்கும் செக்காவின் இந்த வரிகளைப் படிக்கக் கொடுக்கலாம்.

***

Keywords: Anton Chekhov, ஆன்டன் செக்காவ், Russia, Russian Literature, Letters, Advice, Advise, Self Improvement, Self Help, Self Belief, தன்னம்பிக்கை, சுய முன்னேற்றம், சுயமுன்னேற்றம்

எழுத்தாளர்கள் விமர்சனங்களைப் பொருட்படுத்தவேண்டுமா?

எழுத்தாளர்களுடைய முன்னேற்றத்துக்கு, அவர்களுடைய எழுத்துகள் சிறப்பாக அமைவதற்கு விமர்சனங்கள் மிகவும் முக்கியம். நூலைப் படித்து அதை இன்னும் சிறப்பாக்குவதற்கு என்ன செய்யலாம் என்று ஆக்கப்பூர்வமான விமர்சனங்களை முன்வைக்கிற விமர்சகர்களை நாம் கொண்டாடவேண்டும், அவர்களுடைய கருத்துகளைக் கேட்டு, உரியவற்றை மாற்றிக்கொள்ளவேண்டும், மற்றவற்றை மறந்துவிடலாம்.

அதனால்தான், நம்முடைய எழுதுவோம் தளத்திலும் எழுத்துபற்றிய அனைத்துத் தளங்களிலும் விமர்சனங்களைப் பெறுவது, அவற்றைப் பயன்படுத்திக்கொள்வது ஆகியவற்றுக்கு மிகுந்த முக்கியத்துவம் அளிக்கப்படுகிறது. Alpha Readers, Beta Readers என விமர்சகர்களைப் பிரித்து அவர்களுக்கு உங்கள் படைப்புகளை முதலில் படிக்கக் கொடுங்கள் என்று வலியுறுத்துகிறோம். எழுதுபவர், எடிட் செய்பவருக்குத் தெரியாத பல குறைகள், மேம்பாடுகள் இவர்களுக்குத் தெரியக்கூடும், அவை நூலைச் சிறப்பாக்கும்.

புத்தகம் வெளியானபிறகும், அமேசான் போன்ற தளங்களில் அதற்கு எழுதப்படும் விமர்சனங்களை எழுத்தாளர்கள் ஊன்றிக் கவனிக்கிறார்கள். அதிலிருந்து பல விஷயங்களைக் கற்றுக்கொண்டு தங்களுடைய வருங்காலப் புத்தகங்களில் செயல்படுத்துகிறார்கள்.

எனினும், எல்லா விமர்சனங்களும் இப்படி ஆக்கப்பூர்வமாக அமைவதில்லை. சும்மா வீம்புக்கென்று திட்டுகிறவர்கள் இருக்கிறார்கள். இவர்களை எண்ணி மனம் வருந்திக்கொண்டிருந்தால் எழுதுவதற்கு ஏது நேரம்? புறந்தள்ளிவிட்டுச் செல்லப் பழகவேண்டும்.

இந்தக் கோணத்தில் சிந்திக்கும்போது, இன்று ட்விட்டரில் படித்த ஒரு சுவையான கருத்தை உங்கள் பார்வைக்கு வைக்கிறோம்:

பல நேரங்களில், உங்களை விமர்சிக்கிறவர்கள் உங்களைவிடக் குறைவாகப் படைத்துக்கொண்டிருப்பவர்களாக இருப்பார்கள்.

: ஶ்ரீராம்

***

Keywords: Writers, Authors, Criticism, Review, Comments, Feedback, Reviews, Book Review, Book Reviews, Critics, Reviewers, Critic, Reviewer, Feedback Provider, Reader, Alpha Reader, Beta Reader, Readers, Alpha Reader, Beta Readers, Books, Book, Ebooks, Ebook, Creativity

தாத்தா சொல்லைத் தட்டு!

ராபர்ட் ஸ்டீவன்சன் என்று ஒரு பொறியாளர். அவருடைய மகன் தாமஸ் ஸ்டீவன்சன், அவரும் பொறியாளர்தான்.

ஆனால், இந்தத் தாமஸ் பொறியாளர் வேலையோடு நிறுத்தவில்லை. ஓய்வு நேரத்தில் ரகசியமாகச் சில கதைகளை எழுதிக்கொண்டிருந்தார்.

இந்த விஷயம் எப்படியோ ராபர்ட் ஸ்டீவன்சனுக்குத் தெரிந்துவிட்டது, ‘இந்த முட்டாள்தனத்தை நிறுத்திவிட்டு உருப்படுகிற வழியைப் பார்’ என்று தன் மகனை அதட்டினார்.

தாமஸ் ஸ்டீவன்சன் தந்தை சொல் மீறாத பிள்ளை, கதை எழுதுவதை நிறுத்திவிட்டு வேலையில் கவனம் செலுத்தத் தொடங்கினார்.

பின்னர், இந்தத் தாமஸ் ஸ்டீவன்சனுக்கு ஒரு மகன் பிறந்தான். அவனுக்கு ராபர்ட் என்று பெயர் சூட்டினார்.

இந்த ராபர்ட்டுக்குத் தாத்தாவின் பெயர் சூட்டப்பட்டிருந்தாலும், அவனுக்குப் பொறியியலில் ஆர்வம் இல்லை, கதை எழுதுவதில்தான் ஆர்வம்.

இதைக் கேள்விப்பட்ட தாமஸ் ஸ்டீவன்சன் தன் தந்தையைப்போல் நடந்துகொள்ளவில்லை, மகனைத் தொடர்ந்து எழுத ஊக்குவித்தார், தன்னுடைய சொந்தச் செலவில் அவனுடைய முதல் புத்தகத்தை அச்சிட்டு வெளியிட்டார்.

அந்த ராபர்ட் லூயிஸ் ஸ்டீவன்சனை உங்களில் பலருக்குத் தெரிந்திருக்கும். Treasure Island, Kidnapped, The Strange case of Dr. Jekyll and Mr. Hyde உள்ளிட்ட பல புகழ் பெற்ற நூல்களின் ஆசிரியர் அவர்.

Keywords: Writing, Writers, Authors, Encouragement, Family, Support

இயன்றவரை முயல்வேன்!

ஒலிம்பிக்ஸ் இறகுபந்துப் போட்டியில் வெள்ளிப் பதக்கம் வென்ற Tai Tzu-Ying அந்த அனுபவத்தைப்பற்றி எழுதியிருக்கிற வரிகள் இவை:

என்னால் மிக உயர்ந்த பரிசைப் (தங்கப் பதக்கம்) பெற இயலவில்லை. அதை எண்ணிச் சிறிது வருத்தம் உண்டு. ஆனால், எல்லாம் எப்போதும் கச்சிதமாக இருந்துவிடுமா என்ன? கொஞ்சம் குறைகள் இருந்தால்தானே அவற்றைச் சரி செய்து அடுத்தமுறை இன்னும் சிறப்பாகச் செயல்படலாம் என்கிற ஊக்கம் வரும்?

நான் இன்னோர் ஒலிம்பிக்ஸில் பங்கேற்பேனா என்று எனக்குத் தெரியாது. ஆனால், இப்போது நான் வெள்ளிப் பதக்கம் வென்றுள்ளேன். இது முழுமையான வெற்றி இல்லைதான். ஆனால், நான் என்னைப் பார்த்துச் சொல்லிக்கொள்வேன்: நீ மிகச் சிறந்தவள்!

நமக்கு வழங்கப்படும் தீர்ப்புகள் கொடுமையாக இருக்கலாம். ஆனால், என்னால் இயன்றவரை நான் முயல்வேன்!

இந்த வரிகள் விளையாட்டு வீரர்களுக்குமட்டுமில்லை, நம்மைப்போன்ற எழுத்தாளர்களுக்கும் பொருந்தும். நம்முடைய படைப்பின் வெற்றி, தோல்வியைத் தாண்டி, விமர்சகர்களுடைய சொற்களைத் தாண்டி, நம்மால் இயன்ற மிகச் சிறந்த எழுத்தை வழங்கினோம் என்பதுதான் மிகப் பெரிய பெருமை, மிகப் பெரிய மதிப்பு!

எழுதவேண்டிய புத்தகம்

நீங்கள் ஒரு புத்தகத்தைப் படிக்கவேண்டும் என்று மிகவும் விரும்புகிறீர்கள்; ஆனால், அந்தப் புத்தகம் இதுவரை எழுதப்படவில்லை. அப்படியானால், அந்தப் புத்தகத்தை நீங்கள்தான் எழுதவேண்டும்.

– எழுத்தாளர் டோனி மோரிசன்

(Source)

டோனி மோரிசன் நூல்கள்

புதிய மாதம், புதிய திட்டங்கள்

ஆகஸ்ட் பிறந்துவிட்டது. இந்த மாதம் உங்களுடைய திட்டங்கள் என்னென்ன?

தனிப்பட்ட, அலுவல் சார்ந்த திட்டங்களை விடுங்கள். எழுத்துக்கென்று இந்த மாதம் என்ன திட்டங்கள் வகுக்கவுள்ளீர்கள், என்ன இலக்குகளைத் தீர்மானிக்கவுள்ளீர்கள். இதைப்பற்றிச் சிந்திப்பதற்கு இன்று 15 நிமிடம் ஒதுக்குங்கள். சரியான விஷயங்களைத் திட்டமிட்டு அவற்றை நோக்கி நடைபோடுங்கள். வெற்றி நிச்சயம்!

என்ன எழுதுவது என்று திட்டமிடுவோம், அதைச் சிறப்பாக எழுதுவோம்!